काठमाडौं । एनआरटी क्लबले ललित स्मृति यू–१८ फुटबल प्रतियोगितामा विजयी सुरुवात गरेको छ । एन्फा कम्प्लेक्स मैदान सातदोवाटोमा बुधबारदेखि सुरु भएको प्रतियोगिताको उद्घाटन खेलमा एनआरटीले च्यासल युवा क्लबलाई ४–१ गोलले हराएको हो ।
एनआरटीको जितमा रेजन माझी, कृतिशरत्न छुन्जु,शुसान शर्मा धिताल र बिवेक राईले समान एक एक गोल गरे । यता च्यासलका लागि भने एक मात्रै गोल सेरब लो तामाङले गरेका थिए । खेलको पहिलो मिनेटमा नै रेजन माझीले गोल गर्दै एनआरटीलाई १–०को अग्रता दिलाएका थिए । तर उक्त अग्रता खेलको ४४ औं मिनेटमा तोडिएको थियो । च्यासलका लागि सेरब लो तामाङले गोल गर्दै खेल १–१ को बराबरी ल्याए । पहिलो हाफ १–१ गोलको बराबरी खेलेको च्यासल दोस्रो हाफमा राम्रो खेल्न नसक्दा थप तीन गोल खायो ।
एनआरटीका लागि कृतिशरत्न छुन्जुले ५४ औं मिनेटमा गोल गर्दै अग्रता २–१ मा पुर्याए । खेलको ८१ औं मिनेटमा शुसान शर्मा धितालले पेनाल्टीमार्फत गोल गरे । ८७ औं मिनेटमा बिवेक राईले गोल गर्दै एनआरटीलाई ४–१ को सहज जित दिलाए ।
