हुम्ला । मंगलबार कर्णाली नदीमा जिप खसेर बेपत्ता हुनेको संख्या ११ पुगेको छ ।

निर्माण व्यवसायीहरुको डोजर वल्डिङ गर्ने गएका मिस्त्री राजु श्रेष्ठसँगै एकजना कुक पनि भएको पुष्टि भएपछि बेपत्ता हुनेको संख्या ११ पुगेको बताइएको छ । कर्णाली करिडोरको खार्पुबाट याङ्चुसम्म जाने क्रममा वल्डिङ मिस्त्री राजु श्रेष्ठसँग एकजना कुक पनि जिपमा रहेको बुझिएको निमित्त प्रहरी प्रमुख प्रहरी निरीक्षक राज्न्द्रबहादुर सिंह बताए ।

जिप खोजी गर्न गोताखोर हुम्ला पुगे पनि भेट्टाउन सकिएको छैन । सिमकोटदेखि १८ किलोमिटर कच्ची सडक रहेको भए पनि अपत्यारिलो स्थानमा जिप दुर्घटना भएको छ ।

हुम्लाको खार्पुनाथ गाउँपालिका–५ बेडुबिसौनास्थित कर्णाली नदीमा बेपत्ता भएको लु१ज ७१६६ नंको जिपको खोजीकार्यका लागि कुरिनटारबाट गोताखोरसहित सशस्त्र प्रहरी बल निरीक्षक लक्ष्मण बस्नेतको नेतृत्वमा १० जनाको टोली घटनास्थल पुगे पनि पानीको बहाव बढी भएका कारण पत्ता लगाउन समस्या भएको सहायक प्रमुख जिल्ला अधिकारी महेशकुमार पोखरेलले जानकारी दिए ।

बेपत्ता भएकाहरु नभेटिएको भए पनि बुधबार बिहान घटनास्थल भन्दा तीन किलो मिटर तल बोक्चुगौडा नजिकै कर्णाली नदीको किनारमा उपाध्यक्ष शाहीको झोला भेटिएको र घटनास्थल भन्दा चार किलो मिटर तल कारङ्ग खोलामा जिप चालक मणी शाहीको पईन्ट, जुता र माक्स भेटीएको पालिकाका अध्यक्ष कर्ण रावलले बताए । त्यहाँ उपाध्यक्ष शाहीको झोलामा ६४ हजार रुपैयाँ , नागरिकता, अन्य कागजात फेला र कपडा रहेको अध्यक्ष रावलले बताए ।

जिप र सवारयात्रुको कुनै पत्ता नलागेपछि जिल्ला प्रशासन कार्यालय हुम्ला, सामाजिक विकासमन्त्री दल रावल, कर्णाली प्रदेशका प्रमुख प्रतिपक्ष दलका नेता जीवनबहादुर शाहीको पहलमा कुरिनटारबाट गोताखोर हुम्लाको खार्पुनाथ गाउँपालिका–५ स्थित दुर्घटनास्थलमा पुगेको हो ।

कुनिटारबाट दुर्घटनास्थलमा पुगेका शसस्त्र प्रहरी बल निरीक्षक बस्नेतका अनुसार कर्णाली नदीमा पानीको बहाव बढेकाले खोजीकार्य भए पनि भेट्टाउन मुस्किल रहेको जानकारी दिए ।

शोकमा हुम्ला

मंगलबार जिप दुर्घटनामा मृत्यु भएपछि खार्पुनाथ गाउँकार्यपालिकाको आकष्मिक बैठक बसेर १३ दिन सम्म कुनै पनि औपचारीक कार्यक्रम नगर्ने र मृतक १० जनाकै परिवारलाई क्रिया खर्चवापत दशहजार रकम दिने घोषणा गरेको छ ।

असार १५ गतेका दिन शोक सभा सहित गाउँपालिका भित्र रहेका सम्पूर्ण विद्यालय तथा सरकारी कार्यलय १ दिनको लागि बन्द गर्ने निर्णय गरीएको खार्पुनाथ गाउँपालिका ५ का वडाका अध्यक्ष भिमराज शाहीले बताए ।

गाउँपालिका अध्यक्ष कर्ण बाहादुर रावलको अध्यक्षतामा बसेको बैठकले कर्णालीमा खसेको २ दिन भई सकेको र बेपत्ता सबैको मृत्यु भईसकेको भन्दै उक्त निर्णय गरेको हो । दुर्घटनाले गाउँपालिका शोकमा डुबेको छ ।