काठमाडौंः इङल्यान्डमा जारी एक दिवसीय विश्वकप क्रिकेट प्रतियोगिताको फाइनलमा आयोजक इङल्यान्ड प्रवेश गरेको छ । बर्मिङघममा बिहीबार भएको खेलमा डिफेन्डिङ च्याम्पियन अस्ट्रेलिया ८ विकेटले पराजित भएको छ ।
टस जितेर पहिले ब्याटिङ गरेको अस्ट्रेलियाले सबै विकेट गुमाएर ४९.१ ओभरमा २२३ रनको मध्यम स्कोर बनाएको थियो । अस्ट्रेलियाका लागि स्टिभन स्मिथले ८५ रनको महत्वपूर्ण पाली खेलेका थिए । खेलको शुरुमै कप्तान आरोन फिन्च, खतरनाक ब्याट्सम्यान डेभिड वार्नर र पिटर ह्यान्ड्सकम्बलाई गुमाएको अस्ट्रेलियाले एक समय २०० रन पनि बनाउन मुश्किल पर्ने अवस्था देखिएको थियो ।
तर स्मिथ, जेम्स केरी र ग्लेन म्याक्सवेलले टिमको स्कोरलाई सम्मानजनक स्थितिमा पु(याएका थिए ।
जवाफमा २२४ रनको मध्यम स्कोर इङल्यान्ड ३२.१ ओभरमा २ विकेटको क्षतिमा पुर्याएको थियो । इङल्यान्डका लागि प्रारम्भिक ब्याट्सम्यान जेसन रोयले धुँवाधार ब्याटिद्ध गरेका थिए । उनी ८५ रनमा अम्पायर कुमार धर्मसेनाको गलत निर्णयका आधारमा विवादास्पद रुपमा आउट भएका थिए ।
तर इङल्यान्डका कप्तान इयोन मोर्गन र जो रुटले खेललाई सहज रुपमा अगाडि बढाउँदै निर्धारित लक्ष्य पूरा गरेका थिए ।
अब फाइनल खेल आगामी आइतबार इङल्यान्ड र न्यूजील्यान्डबीच नेपाली समय अनुसार अपराह्न ३.१५ बजे हुनेछ । यी दुबै टिमले हालसम्म विश्वकप क्रिकेट जितेका छैनन् । त्यसर्थ जसले जिते पनि पहिलो उपाधि प्राप्त गर्नेछन् ।