काठमाडौं । विश्वकप क्रिकेटको फाइनल खेलमा टस जितेर पहिले ब्याटिङ गरेकाे न्यूजील्याण्डले इङ्ल्यान्ड विरूद्ध ८ विकेटकाे क्षतिमा २४१ रन बनाएकाे छ ।
न्यूजील्यान्डका लागि हेनरी निकाेल्सले ५५ र टम लथमले ४७ रनकाे व्यक्तिगत इनिङ खेले पनि अरू ब्याट्सम्यान सस्तैमा अाउट भएका थिए ।
कसिलाे बलिङ र फिल्डिङ गरेकाे इङ्ल्यान्डका लागि क्रिस वाेक्स र लियाम प्लन्केटले समान तीन तीन विकेट लिएका थिए ।
जितका लागि २४२ रनकाे चुनाैती पाएकाे इङल्यान्डले ब्याटिङ शुरू गरिसकेकाे छ ।
अहिले क्रिजमा जाेनी बेयरस्टाे र जाे रूट रहेका छन् ।
लर्डसमा भइरहेको यस खेलमा यो पटक विश्वकपले नयाँ विजेता पाउनेछ । विश्वकप क्रिकेटमा अष्ट्रेलियाका सहायक प्रशिक्षकको भूमिका निभाएका रिकी पोन्टिङले इंग्ल्यान्डले नै विश्वकपको उपाधी जित्ने दाबी गरेका छन् ।
पोन्टिङले भनेका छन्– मलाई लाग्छ कि इंग्ल्यान्डले विश्वकप जित्नेछ । मैले विश्वकप सुरु हुनुअघि नै भनेको थिएँ की इंग्ल्यान्डलाई हराउन सजिलो छैन । मैले पहिले पनि विश्वकप जित्ने प्रमुख दाबेदार टिमको रुपमा लिएको थिएँ । अहिले पनि इंग्ल्यान्डले नै जित्छ जस्तो लागेको छ ।’
यो पटक इंग्ल्यान्डका खेलाडीमा राम्रो प्रतिभा भएको कारण उपाधि जित्न सक्ने पोन्टिङ बताउँछन् ।
विश्वकप क्रिकेटमा लगातार तीन ठूला टिमलाई जितेपछि घरेलु टोली इंग्ल्यान्ड फाइनलमा प्रवेश गरेको हाे ।पाँच पटकको च्याम्पियन अष्ट्रेलियालाई सेमिफाइनलमा ८ विकेटले पराजित गर्नुअघि इंग्ल्यान्डले लगातार भारत र न्युजिल्यान्डलाई पराजित गर्दै अन्तिम चारमा स्थान बनाएको थियो ।इंग्ल्यान्ड चौथो पटक विश्वकप फाइनल खेल्दैछ भने न्युजिल्यान्ड दोस्रो पटक ।
