काठमाडौं । अन्तराष्ट्रिय क्रिकेट काउन्सिल (आईसीसी) ले जिम्बाब्वे क्रिकेटलाई निलम्बन गरेको छ ।जिम्बाबेको क्रिकेट बोर्डमा सरकारले अनावश्यक हस्तक्षेप गरेको भन्दै आईसीसीले निलम्बन गरेको हो ।
आईसीसीको बिहिबार लन्डनमा बसेको बोर्ड बैठकले जिम्बावे क्रिकेट बोर्डको निर्वाचन लोकतान्त्रिक नभएको र सरकारको चरम हस्तक्षेप भएको उल्लेख गर्दै जिम्बाबेलाई निलम्बन गर्ने निर्णय गरेको थियो ।
‘हाम्रो सदस्य राष्ट्रलाई निलम्बन गर्ने कुरालाई हामीले हलुका रूपमा लिएका छैनौं । तर खेलमा राजनीतिक हस्तक्षेप नहोस भन्ने चहन्छौं, जुन जिम्बाबेमा भयो र उनीहरूले आईसीसीको विधानविपरित काम गरे,’ आईसीसीका प्रमुख शशांक मनोहरले भने ।
बैठकले आर्थिक सहायता रोक्न र आफ्नो कुनै पनि प्रतियोगितामा सहभागी हुन नपाउने गरी निलम्बन गरेको छ । आईसीसीले जिम्बाब्वेको आर्थिक सहायता रोक्नुको मुख्य कारण आफूले दिएको रकमको ठूलो हिस्सा क्रिकेट र खेलाडीको हितमा प्रयोग गर्नुको साटो जिम्बाब्वे सरकारले लगेको हुनसक्ने आईसीसीको बुझाइ छ । जिम्बाब्वे आर्थिक संकटमा छ ।
यससँगै अगष्टमा हुने महिला टी–२० विश्वकप छनोट र अक्टोबरमा हुने टी–२० विश्वकप छनोट जिम्बाब्वे सहभागी हुने सम्भावना न्यून भएको छ ।
तीनबर्ष अघि आईसीसीले नेपाल क्रिकेट संघ (क्यान) लाई पनि सोही कारण देखाउँदै निलम्बन गरेको थियो । आईसीसीले नेपालमाथिको निलम्बन अझै फुकुवा गरेको छैन ।
नेपाली क्रिकेटलाई आईसीसीले अन्तर्राष्ट्रिय सहभागिताबाट भने रोकेको छैन । नेपाली क्रिकेट अहिले आईसीसीकै निगरानीमा रहेर अन्तर्राष्ट्रिय प्रतियोगिता खेलिरहेको छ ।
