काठमाडौं । इटालियन सिरी ए च्याम्पियन युभेन्ट्सले नेदरल्यान्ड्सका युवा डिफेन्डर म्याथिज डि लिटलाई अनुबन्ध गरेको छ । डि लिटलाई युभेन्टसले बिहीबार अनुबन्ध गरेको घोषणा गरेको हो ।
क्लबका अनुसार आठ करोड ४२ लाख डलरमा उनी आयाक्सबाट युभेन्टसमा स्थानान्तरित हुन राजी भएका हुन् ।उन्नाइस वर्षीय यी प्रतिभाशाली डच खेलाडीको करार अवधि पाँच वर्षको रहेको छ ।युभेन्टसले जारी गरेको विज्ञप्तिमा डी लीटले करार रकमका अतिरिक्त थप एक करोड ५ लाख युरो पनि पाउने उल्लेख छ ।
। डि लिटले युभेन्टसमा आउनुको मुख्य कारण पोर्चुगिज स्टार खेलाडी क्रिस्टियानो रोनाल्डो भएको जनाएका छन् । डि लिटले भने, ‘ यो सबैको प्रशंसा रोनाल्डोलाई जान्छ । किनकी रोनाल्डोले मलाई यहाँ अनुबन्ध हुन आग्रह गरेका थिए । उनले मलाई युभेन्टसमा आमन्त्रित गरे ।’
डी लीटको सम्झौता रकम युभेन्टसको इतिहासमा तेस्रो सर्वाधिक बढी रकम हो । सन् २०१८ मा क्लबले क्रिस्टियानो रोनाल्डोका लागि १० करोड ५० लाख युरो भुक्तानीमा सम्झौता गरेको थियो भने सन् २०१६ मा गोन्जालो हिगुइनका लागि नौ करोड युरो भुक्तानी गर्न सहमति जनाएको थियो ।
डी लीटले आयाक्सका लागि ११७ खेल खेलेर १३ गोल गरेका छन् । यस सिजनको च्याम्पियन्स लिगको क्वाटर फाइनलमा आयाक्ससँग युभेन्टस पराजित हुँदा डी लीटले नै गोल गरेका थिए । डी लीटले नेदरल्यान्ड्सका लागि राष्ट्रिय टोलीबाट १७ खेल खेलिसकेका छन् । उनी आयाक्सको कप्तान समेत भइसकेका छन् ।