काठमाडौं । पार्टी एकीकरण भएको पन्ध्र महिनापछि नेपाल कम्युनिष्ट पार्टीले एकताको बाँकी कामलाई पूर्णता दिने भएको छ । अध्यक्षद्धय केपी शर्मा ओली र पुष्पकमल दाहाल ‘प्रचण्ड’ बीच भएको सहमतिअनुसार विभाग र केन्द्रीय सदस्यहरुको कार्य विभाजनको टुंगो लाग्ने भएको छ ।
विभाग तथा आयोगका प्रमुख र केन्द्रीय सदस्यहरुको कार्यविभाजन गरेर देशव्यापी रुपमा कार्यक्रम सञ्चालन गर्ने पार्टी प्रवक्ता नारायणकाजी श्रेष्ठले बताउनुभयो ।
उहाँले नेपाल समाचारपत्रसँग भन्नुभयो, ‘कतिपय विषयमा सहमति जुटिसकेको छ, केही विषयमा सहमति जुट्न बाँकी छ, सम्भवत् सचिवालय बैठकले बाँकी कामको टुंगो लगाउनेछ ।’
महत्वपूर्ण मानिएको विभाग र आयोग प्रमुखको नामावली मोटामोटी टुंगो लागिसकेको छ । विदेश विभाग प्रमुखमा वरिष्ठ नेता माधवकुमार नेपाल, नीति अध्ययन प्रतिष्ठानको प्रमुखमा वरिष्ठ नेता झलनाथ खनाल र संगठन विभागको प्रमुखमा वामदेव गौतम रहने सहमति जुटेको बताइएको छ । पूर्व एमालेबाट विभाग र आयोगको प्रमुख बन्नेहरुको नामावली तयार भएपछि पूर्व माओवादी केन्द्रको भागमा परेको विभाग प्रमुखको नामावली टुंगो लगाउन प्रचण्डलाई सकस परेको छ । विभाग र आयोगको प्रमुख बन्ने आकांक्षीको संख्या धेरै हुँदा नाम टुंगो लाग्न नसकेको बताइएको छ ।
सचिवालयमा रहनुभएका अध्यक्षद्धय र महासचिवले विभागको जिम्मेवारी नलिने विषयमा मोटामोटी सहमति भएपछि संगठन विभागको प्रमुख वामदेव गौतमलाई दिँदा महासचिव विष्णु पौडेललाई कुन विभागको प्रमुख बनाउने भन्ने विषयमाथि पनि छलफल सुरु भएको छ । सचिवालयका एक सदस्यका अनुसार अध्यक्ष ओली र महासचिव पौडेललाई विभागको प्रमुख नदिने विषयमा मोटामोटी सहमति जुटे पनि अर्का अध्यक्ष प्रचण्डको जिम्मेवारी तोक्नुपर्ने विषय पार्टीभित्र उठेकै छ । एकीकरण भएको लामो समय बितिसक्दा समेत प्रचण्डले अध्यक्षको हैसियतमा निर्वाह गर्ने भूमिकाको बारेमा स्पष्ट हुन नसकेको बताइन्छ ।
एकीकरणपूर्व अध्यक्ष ओलीले सरकार र अध्यक्ष प्रचण्डले पार्टीको जिम्मेवारी लिने सहमति भएको थियो । तर एकीकरणको पन्ध्र महिना बितिसक्दा समेत अध्यक्ष प्रचण्डको भूमिका तोकिएको छैन । प्रचण्डले पार्टी सञ्चालन गर्ने जिम्मेवारी पाए ओली नेतृत्वको सरकारलाई नै निरन्तरता दिने घोषणा गरिसक्नुभएको समाचार नेपाल समाचारपत्र दैनिकमा प्रकाशित छ ।
