काठमाडौँ । नेपाली काग्रेसका सहमहामन्त्री डा.प्रकाशशरण महतले विपी कोइरालकाको समाजवादको सपना साकार पार्न नेपाली काँग्रेसको सशक्तता आवश्यक रहेको बताएका छन् ।
विपी स्मृति दिवसका अवसरमा विपी कोइराला स्कुल अफ पब्लिक पोलिसीद्धारा आयोजित सवल लोकतन्त्रका लागि लागि सचेत युवा विषयक बिचार गोष्ठीलाई प्रमुख अतिथिका रुपमा सम्बोधन गर्दै सहमहामन्त्री डा. महतले मुलुकले अहिले अरु केही नभएर बलियो काँग्रेस पार्टी खोजेको बताए ।
तर यसको मतलब अहिले पनि काँग्रेस कमजोर छ भनेर नबुझ्न पनि उनले आग्रह गरे । विसं २०१५ सालमा नेपाली काँग्रेसले दुई तिहाई बहुमत ल्याउँदा पनि नेपाली काँग्रेसले ३८ प्रतिशत मत ल्याएको र अहिलेको पछिल्लो निर्वाचनमा पनि प्रत्यक्षतर्फ ३६ प्रतिशत मत ल्याएर मतका आधारमा काँग्रेस नै देशको पहिलो पार्टी भएको प्रसंग डा.महतले उल्लेख गरे ।
तर अहिले काँग्रेसमा सामुहिकता आवश्यक रहेको उनको भनाई थियो । काँग्रेस मतका आधारमा ठूलो पार्टी छ तर किन कम्युनिष्टहरुले दुइ तिहाई निकटको सरकार बनाएका छन्, यो प्रश्नको जवाफ अब हामी काँग्रेसहरुले आफैसँग खोज्नुपर्ने छ ।
संसारमा कहीँ कतै चुनाव नजितेको कम्युनिजमको नक्कली वाद नेपालमा रहेको र यसका कारण नागरिकमा अधिकारविहीनताको अवस्था छाएको उनको भनाई थियो । उनले भने– विपी कोइराला कम्युनिष्टहरु प्रजातन्त्रवादी नहुने र उनीहरुले सबै शक्ति आफैमा केन्द्रित गरी नागरिकलाई अधिकारविहीन अवस्था राख्ने विचार राख्नुभएको र जुन अहिले देखिएको छ ।
उनले काँग्रेसका कार्यकर्ताहरुलाई एकताबद्ध भएर लाग्न पनि आग्रह गरे । नेपाली काँग्रेसका साथीहरुले यो सरकारको सर्वसत्तावादविरुद्ध लाग्ने बेला भएको छ उनले भने । हामी आफै बलियो छौँ तर पनि काँग्रेसले काँग्रेसकै विरोध गर्ने र विपक्षमा लाग्ने प्रवृत्तिका कारण हामीले मार खाएका छौँ, यो कुरालाई अब बेलैमा मनन् गरौँ, जागरणमा लागौँ र काँग्रेसलाई नयाँ उर्जा दिउँ– उनको भनाई थियो ।
उनले काँग्रेस आफै एक भएर अघि बढ्न सकेमा आगामी निर्वाचनमा बहुमत ल्याउन काँग्रेसलाई कसैले पनि रोक्न नसक्ने जिकीर गरे । कम्युनिष्टका फोस्रा नारा र आश्वासन जनताले भोगिसकेका, देखिसकेका छन् त्यसैले अब काँग्रेसले एक भएर देशलाई नेतृत्व दिन अघि बढ्नुपर्छ, उनले भने ।
डा महतले स्व बिपी कोइरालाले प्रजातन्त्रको स्थापना, राष्ट्रियता र समाजवादका लागि देखाएको मार्ग तथा देश र जनताका लागि दिएको योगदान वर्तमान समयमा पनि उत्तिकै सान्दर्भिक रहेको बताए ।
उनले भने– विपी जस्ता व्यक्ति युग पुरुष भएकोले एक युगमा एकजना मात्र जन्मिन्छन् तर उनीहरुका विचार नै अमर हुने भएकोले हामीले त्यसलाई अनुशरण गरी अघि बढ्नुपर्छ ।
विपी कोइरालाको अभाव पूर्ती गर्नका लागि नेपाली काँग्रेसको सामुहिक बल आवश्यक छ उनले भने । विपीको विचारलाई अघि लाएर कुनै पनि व्यक्ति नभएर पार्टी र विचार ठूलो हो भन्ने आम धारणाका साथ अघि बढ्न सक्यौँ भने यसले विपीप्रति सच्चा सम्मान हुन्छ र नेपाली काँगेस पनि बलियो हुन्छ उनले भने ।
यो मुलुकमा प्रजातन्त्र ल्याउन एवं राणाको जहानियाँ शासन अन्त्य गर्न बिपी कोइरालाले निर्वाह गरेको भूमिकालाई राष्ट्रले सदैव सम्झिरहनुपर्ने उनको भनाई थियो ।
