काठमाडौं । भारतका सबैभन्दा ठूलो कफी चेन क्याफे कफी डे (सीसीडी) का संस्थापक वीजी सिद्धार्थको शव बुधबार बिहान मेंगलुरुको नेत्रावती नदीमा भेटिएको छ । उनि कर्नाटकका पूर्व मुख्यमन्त्री एसएम कृष्णाका ज्वाईं समेत हुन् ।
मंगलुरुका पुलिस कमिश्नर संदीप पाटिलका अनुसार हुइगेबजार नजिकै नदीमा तैरिरहेको अवस्थामा उनको शव भेटिको हो ।परिवारका सदस्यहरुले उनको शव भएको पुष्टि गरेपछि अस्पताल लैजाने प्रहरीको तयारी छ ।
सोमबार राती उनी हराएपछि दुइ सयजना खोजी अभियानमा जुटेका थिए । यतिबेला कोस्ट गार्डको जहाज आइसीजीएस राजदूत र एसीवी (एच–१९८) को पनि मद्दत लिइयो ।
२७ जुलाईमा लेखिएको सिद्धार्थको एउटा पत्र सार्वजनिक भएको थियो जसमा उनले इक्विटी पार्टनर तथा ऋणदाताहरुको दबाबबारे जानकारी दिएका थिए । जुन सिद्धार्थकै भएको पुष्टि भएको प्रहरीले जनाएको छ । उनले व्यवसायीको रुपमा आफू असफल भएको पनि बताएका थिए । क्याफे कफी डे परिवार र निर्देशकलाई सम्बोधन गरिएको सिद्धार्थको पत्रमा लेखिएको छ, ‘म लामो समयदेखि संघर्ष गरिरहेँ, तर अब सम्भव रहेन । म आफ्नो प्राइभेट इक्विटी पार्टनर र अन्य ऋणदाताको दबाव झेल्न सक्दिनँ । इनकम ट्याक्सका एक महानिर्देशकको उत्पीडन पनि सामना गर्नु परेको छ ।’
इनकम ट्याक्स डिपार्टमेन्टले भने आफ्नो कारवाहीको बचाउ गर्दै पत्रको सत्यतामाथि शंका गरेको छ ।
भारतीय सञ्चार माध्यमहरुकाअनुसार पत्रमा सिद्धार्थले सबै गल्तीका लागि आफू जिम्मेवार रहेको बताएका छन् । उनले भनेका छन्, ‘मेरो उद्देश्य कहिल्यै धोका दिने थिइन । मलाई आश छ कि एक न एक दिन तपाईले यो सम्झनु हुनेछ ।’