काठमाडौं । पृथ्वी राजमार्गअन्तर्गतको मुग्लिन नारायणगढ सडक खण्डस्थित तनहुँ– चितवन जोड्ने आर्क ब्रिज सञ्चालनमा आएको छ।
नेपालले आफ्नै लगानी, प्रविधि र दक्षता प्रयोग गरी यो आर्क ब्रिज निर्माण गरेको हो । सडक विभागको पुल महाशाखाका अनुसार २ वर्षअघि नै बनिसक्नुपर्ने पुल ढिला गरी निर्माण सकिएर सञ्चालनमा ल्याइएको छ । नयाँ प्रविधिमा नेपाली ठेकेदारले नै काम गरेकोले यो पुल बनाउँदा ढिलाई भएर तीनपटक म्याद थप गर्नुपरेको थियो ।
पुल योजना मध्ये क्षेत्र सेक्टर नम्बर दुई ललितपुर योजना प्रमुख अंगलाल रोकायाले काम सम्पन्न भएलगत्तै आर्क ब्रिज सञ्चालनमा आएको बताए। ‘जेठमा सम्पन्न हुने पर्नेमा पेन्टीङ्ग गर्ने काम बाँकी थियो र सोमबारबाट सञ्चालनमा आएको हो’ उनले भने। उक्त पुल १२ करोड लागतमा बनेको हो।
यो पुलको निर्माण इलाइट एड्भेन्चर लोहनी जेभीले गरको हो । यो नेपाली ठेकेदार कम्पनी नै हो । डिजाइन एन्ट मल्टि मोडलमा बनेको पुलको डिजाइन पनि नेपाली ठेकेदारले नै गरेका हुन् । १६० मिटर लम्बाई र ११ मिटर चौडाईमा बनेको सो पुल दुई लेनमा बनेको छ।