काठमाडौं । घुस रकम सहित पक्राउ परेका बारा जिल्ला पचरौता नगरपालिकाका इन्जिनियर राम प्रकाश सतराविरुद्ध मुद्दा दर्ता गरिएको छ ।
अख्तियार दुरूपयोग अनुसन्धान आयोगको कार्यालय, हेटौंडा, मकवानपुरबाट खटिई गएको टोलीले निज इन्जिनियर सतरालाई सेवाग्राहीसँग पन्ध्र हजार घुस रकम लिइसकेको अवस्थामा पक्राउ गरेको थियो ।
उनले पचरौता नगरपालिकास्थित विद्यालयको कम्पाउण्ड वाल निर्माण सम्पन्न भए पश्चात नियमानुसार भुक्तानीका लागि सिफारिस गर्नुपर्नेमा सो नगरी विभिन्न बहाना गरी सेवाग्राहीसँग घुस लिएको आरोपमा पक्राउ गरिएको आयोगका प्रवक्ता प्रदीपकुमार कोइरालाले जनाए ।
सतरालाई पन्ध्र हजार कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को देहाय (क) बमोजिम सजाय हुन मागदाबी लिई आज विशेष अदालत काठमाडौंमा आरोप पत्र दायर गरिएको हो ।
