काठमाडौं । अवरुद्ध संसद खुलाउने विषयमा सत्ता र प्रतिपक्ष आफ्नो अडानबाट पछि नहटेपछि विहीबारका लागि बोलाइएको संसद बैठक पनि अनिश्चित बनेको छ ।
प्रमुख प्रतिपक्ष कांग्रेस र राजपाले सर्लाहीमा भएका दुई घटना (कुमार पौडेल हत्या र सरोजनारायण सिंहको ) बारे संसदीय छानविन समिति गठन नगरेसम्म बैठक चल्न नदिने अडान राख्दै गत असार २४ गतेदेखि बैठक अवरुद्ध गर्दै आएका छन् ।
अवरुद्ध संसद बैठक खुलाउन सभामुख कृष्णबहादुर महराले गत साउन १६ गते बिहीबार बोलाएको सर्वदलीय बैठकमा समेत सहमति नजुटेपछि सूचना टाँसेर साउन २० गते सोमबारसम्मका लागि बैठक स्थगित गरिएको थियो ।
त्यसपछि प्रतिपक्षलाई मनाउन सक्रिय बनेका सभामुख महराले शनिबार र आइतबार छुट्टाछुट्टै छलफल गरेका छन् । शनिबार टेलिफोनबाट प्रमुख प्रतिपक्ष दलका नेताहरुसँग कुरा गरेका महराले आईतबार आफ्नै कार्यकक्ष सिंहदरवारमा उनीहरुलाई भेटेर अवरुद्ध संसद खुलाउन छलफल गरेका हुन् ।
सभामुख महरासँगको भेटपछि राजपाका नेता कर्णले संसदको अवरोध हटाउने विषयमा सहमति जुट्न नसकेको प्रतिकृया दिए । ‘सभामुखसँग भेटघाट र कुराकानी भयो । तर कुरो मिलेन । उहाँहरु समिति गठनको विपक्षमा हुनुहुन्छ । हामी समिति गठन नगरेसम्म सदन चल्न दिने पक्षमा छैनौ’ राजपा नेता कर्णले भने, ‘दुवैका अडानमा कुनै परिवर्तन आएन । पुन छलफलका लागि पनि समय निर्धारण भएको छैन ।’
यसैबीच सत्तापक्षका नेता देव गुरुङले प्रतिपक्षसँग सहमतिको प्रयास जारी रहेको बताए । उनले छलफल जारी नै रहेकाले भोलिसम्म सहमतिमा पुग्न सकिने सम्भावना जिवितै रहेको बताए ।
नेत्रविक्रम चन्द विप्लव समूहका नेता पौडेलको असार ५ गते प्रहरीको गोली लागि मृत्यु भएको थियो भने सिंहको क्रसर उद्योगले खनेको खाल्डोमा डुवेर बालकको ज्यान गएको विरोधमा भएको प्रदर्शनका क्रममा भएको झडपमा ज्यान गएको थियो । तर, सत्तापक्ष सर्लाही घटना स्थानीयस्तरमा मिलिसकेकाले संसदीय छानवन समिति आवाश्यक नभएको भन्दै समिति गठनको विपक्षमा उभिदै आएको छ ।
