नवलपरासी । सङ्गठित अपराध मुद्दामा फरार रहेका नेत्रविक्रम चन्द (विप्लव) समूहका एक जिल्ला नेता पक्राउ परेका छन् ।
पइलाका प्रहरी कार्यालय बर्दघाट र इलाका प्रहरी कार्यालय सेमरीको संयुक्त टोलीले विप्लव समूहका नवलपरासी जिल्ला सदस्य तथा सरावल गाउँपालिका इन्चार्ज लोकमान भन्ने चैत्रराम मुसहरलाई पक्राउ गरेको हो ।
प्रहरीले मुसहरलाई हिजो सार्वजनिक गरेको हो ।आगो लगाई सङ्गठित अपराध मुद्दामा फरार अभियुक्त मुसहरलाई उनकै घर बर्दघाट–१२ सपैयाबाट पक्राउ गरको प्रहरीले जनाएको छ । गत २०७५ फागुन ३० गते विप्लव समूहले आह्वान गरेको बन्दको पूर्वसन्ध्यामा सरावल–१ बासामा रोकिराखेको ना५ख ७७४१ र ना४ख ६८२५ नंको ट्रकमा आगो लगाएको घटनामा संलग्न रही फरार रहेका उनको पुनः यही साउन १६ गते बर्दघाट–१३ स्थित एनसेल टावर क्षति पुर्याउने घटनामा पनि संलग्नता देखिएको जिल्ला प्रहरी कार्यालय पश्चिम नवलपरासीले जनाएको छ । ।
पक्राउ परेका मुसहरविरुद्ध आवश्यक अनुसन्धान अगाडि बढाइएको प्रहरीले जानकारी दिएको छ ।
