विराटनगर । मोरङको कानेपोखरी गाउँपालिका–७ बरगाछीमा रहेको एउटा सहकारीबाट पाँच लाख रुपैयाँभन्दा बढी नगद चोरी भएको छ। जनमुखी बचत तथा ऋण सहकारी संस्थाको पाँच लाख पाँच सय ५१ रुपैयाँ चोरी भएको इलाका प्रहरी कार्यालय पथरीका प्रहरी निरीक्षक राम ढकालले बताए।
उनले शनिबार राति सहकारी भवनको झ्यालको ग्रील फुटाएर चोरी भएको जानकारी दिए। भूइँतलमा रहेको कार्यालयको पूर्वतर्फको ग्रील भत्काएर बाकसभित्र राखिएको सेभ समेत फुटाएर चोरी गरिएको सहकारीका उपाध्यक्ष हरि कोइरालाले बताए। उनका अनुसार आइतबार बिहान ७ बजे सहरकारी खोल्दा बचत परिचालक रमेश शिवाकोटीले चोरी भएको थाहा पाएर खबर गरेका हुन्।
चोरी गर्नेको पहिचान हुन नसकेको र खोजी गर्दै अनुसन्धान अघि बढाइएको जानकारी उनले दिए।
