काठमाडौं । चालु आर्थिक वर्ष २०८३/८४ को पहिलो महिना साउनमा नेपाल भित्रिने विप्रेषण (रेमिट्यान्स) आप्रवाह २१.२ प्रतिशतले बढेको छ। नेपाल राष्ट्र बैंकले सार्वजनिक गरेको तथ्यांकअनुसार साउनमा नेपालीले विदेशबाट पठाएको रकम २ खर्ब १५ अर्ब ५ करोड रुपैयाँ पुगेको हो।
गत आर्थिक वर्षको साउनमा विप्रेषण आप्रवाह २९.९ प्रतिशतले बढेको थियो। अमेरिकी डलरमा गणना गर्दा पनि रेमिट्यान्स आप्रवाह १०.२ प्रतिशतले वृद्धि भई १ अर्ब ४० करोड डलर पुगेको राष्ट्र बैंकले जनाएको छ। अघिल्लो वर्षको सोही अवधिमा डलरमा रेमिट्यान्स २५ प्रतिशतले बढेको थियो।
समीक्षा अवधिमा खुद द्वितीय आय अर्थात् खुद ट्रान्सफर पनि बढेको छ। साउनमा यस्तो आय २ खर्ब २९ अर्ब ९८ करोड रुपैयाँ पुगेको छ। अघिल्लो वर्षको साउनमा खुद द्वितीय आय १ खर्ब ९३ अर्ब ८५ करोड रुपैयाँ थियो।
यसबीच वैदेशिक रोजगारीमा जाने नेपालीको नयाँ श्रम स्वीकृति लिने संख्या भने केही घटेको छ। साउनमा संस्थागत तथा व्यक्तिगततर्फ नयाँ अन्तिम श्रम स्वीकृति लिने नेपालीको संख्या ४२ हजार ६९३ रहेको छ। अघिल्लो वर्षको सोही अवधिमा ४४ हजार ४६६ जनाले यस्तो स्वीकृति लिएका थिए।
तर, पुनः श्रम स्वीकृति लिनेको संख्या भने बढेको छ। साउनमा २७ हजार ७४८ नेपालीले पुनः श्रम स्वीकृति लिएका छन्। अघिल्लो वर्षको सोही अवधिमा यस्तो संख्या २३ हजार ६४४ रहेको थियो।
यसले नयाँ श्रम स्वीकृति लिनेको संख्या घटे पनि विदेशमा रहेका नेपालीबाट नेपाल भित्रिने विप्रेषण र पुनः श्रम स्वीकृति लिनेको संख्या बढेको देखाएको छ।
