काठमाडौं । नेपाली काँग्रेसका सभापति गगनकुमार थापाले पार्टीको महाधिवेशनलाई एकतावद्ध रूपमा सम्पन्न गर्न आफूले आवश्यक लचकता अपनाउन तयार रहेको बताउनुभएको छ ।
बिहीवार पार्टी केन्द्रीय कार्यालय सानेपामा बसेको केन्द्रीय कार्यसमिति बैठकमा बोल्दै सभापति थापाले महाधिवेशन एकै ठाउँमा सम्पन्न गर्न आफ्नो तर्फबाट गर्नुपर्ने सबै पहल गर्न तयार रहेको बताउनुभएको हो ।
उहाँले पूर्वसभापति शेरबहादुर देउवासहित पार्टीका वरिष्ठ नेताहरूलाई महाधिवेशन छुट्टाछुट्टै गर्नुपर्ने कुनै कारण वा अवस्था नरहेको भन्दै सबैलाई एक ठाउँमा जोडेर महाधिवेशन सम्पन्न गर्न आग्रह गर्नुभयो ।
सभापति थापाले पार्टीका सबै पक्षलाई समेटेर सहमतिका साथ अघि बढ्न आफूले आवश्यक पहल गर्ने प्रतिबद्धता जनाउनुभयो । महाधिवेशन व्यवस्थापनका लागि आफ्नो संयोजकत्वमा समिति बनाउने निर्णय भएको जानकारी दिँदै उहाँले छोटो समय भएकाले केन्द्रीय समितिका केही सदस्यलाई जिल्ला तथा तल्लो तहमा नजाई व्यवस्थापनको काममा सहयोग गर्न आग्रह गर्नुभयो ।
उहाँका अनुसार महाधिवेशनका लागि आवास, भोजनलगायत विभिन्न पक्षको व्यवस्थापन गर्न छुट्टाछुट्टै समिति बनाएर आवश्यक लजिस्टिक तयारी गरिनेछ ।
सभापति थापाले महाधिवेशनपछि भ्रातृ संस्थालगायत पार्टीका अन्य विषयमा पनि सबैसँग सरसल्लाह गरेर अघि बढ्ने बताउनुभयो ।
उहाँले भन्नुभयो, “अब हामीले छुट्टाछुट्टै महाधिवेशन गर्नुपर्ने कुनै कारण वा अवस्था छैन । सबैलाई एकै ठाउँमा जोडेर महाधिवेशन सम्पन्न गरौँ । पार्टीको जिम्मेवारीमा रहेकाले सबैलाई समेटेर अघि बढ्न मेरो तर्फबाट गर्नुपर्ने जुनसुकै पहल र आवश्यक लचकता अपनाउन म तयार छु ।”
सभापति थापाले पार्टीका वरिष्ठ नेताहरूलाई पनि महाधिवेशन एकतावद्ध रूपमा सम्पन्न गर्ने वातावरण निर्माणका लागि सहयोग र सहकार्य गर्न पुनः आग्रह गर्नुभयो ।
