काठमाडौं । नेपाली कांग्रेसका सचेतक निष्कल राईले विपद्को समयमा अहङ्कारभन्दा संवाद, धम्कीभन्दा जिम्मेवारी र प्रचारभन्दा परिणाममा जोड दिन सरकारलाई आग्रह गर्नुभएको छ ।
प्रतिनिधि सभाको बुधवारको बैठकमा बोल्दै सचेतक राईले रसुवाको भोटेकोशी बाढीबाट प्रभावित नागरिकको पुनस्र्थापना तथा पुनर्निर्माणका लागि तत्काल स्पष्ट कार्ययोजना ल्याउन सरकारसँग माग गर्नुभयो ।
उहाँले बाढीका कारण घर तथा आफन्त गुमाएका नागरिकको पुनस्र्थापना कहिले र कहाँ हुन्छ भन्नेबारे सरकारले तत्काल जवाफ दिनुपर्ने बताउनुभयो । पीडित नागरिकले आफ्नै घर कहिले पाउने र त्यस अवधिसम्म उनीहरूलाई कहाँ तथा कसरी राख्ने भन्ने विषयमा सरकारले स्पष्ट योजना सार्वजनिक गर्नुपर्ने उहाँको भनाइ थियो ।
सचेतक राईले बाढी प्रभावित क्षेत्रमा स्वच्छ खानेपानी तथा सरसफाइको अभाव, सङ्क्रामक रोगको जोखिम, खाद्य सङ्कट र मानसिक स्वास्थ्यसम्बन्धी समस्या बढ्न सक्ने भन्दै तत्काल एकीकृत स्वास्थ्य तथा पुनस्र्थापना कार्यक्रम सञ्चालन गर्नुपर्ने बताउनुभयो ।
उहाँले स्वास्थ्य मन्त्रालय, स्थानीय तह र सम्बन्धित निकायबीच समन्वय गरी मनोसामाजिक परामर्श, स्वास्थ्य शिविर, सरसफाइ, सुरक्षित खानेपानी तथा रोग नियन्त्रणका कार्यक्रम एकीकृत रूपमा सञ्चालन गर्नुपर्नेमा जोड दिनुभयो ।
बाढीका कारण परिवारका सदस्य, घर तथा सम्पत्ति गुमाएका नागरिकको पीडा आर्थिक क्षतिमा मात्र सीमित नरहेको उल्लेख गर्दै उहाँले राज्यले संवेदनशीलताका साथ पुनस्र्थापना र पुनर्निर्माणको काम अघि बढाउनुपर्ने बताउनुभयो ।
“रोशीको बाढीमा घर गुमाएका नागरिकले, आफन्त गुमाएका परिवारले, रोजगारी गुमाएका युवाले, महँगीले थिचिएका परिवारले, न्याय खोजिरहेका नागरिकले र भविष्य खोजिरहेको नयाँ पुस्ताले सरकारसँग भाषण होइन, अब परिणाम खोजेको छ,” उहाँले भन्नुभयो ।
सचेतक राईले विपद् व्यवस्थापनमा सुरुदेखि नै तीनै तहका सरकारबीच प्रभावकारी समन्वय हुन नसक्दा प्रतिकार्यमा समस्या देखिएको पनि बताउनुभयो । उहाँले सरकारले प्रतिपक्षी दलहरूसँग आवश्यक समन्वय र सहकार्य गर्न नखोजेको भन्दै त्यसतर्फ पनि प्रश्न उठाउनुभयो ।
