काठमाडाैँ । रुपन्देहीमा नेपाल आयल निगमका ट्याङ्करबाट डिजेल चोरी गरिरहेको अवस्थामा तीनवटा ट्याङ्करसहित एक जना पक्राउ परेका छन् ।
सिद्धार्थ नगरपालिका–८ स्थित क्षेत्रमा मंगलबार नेपाल आयल निगमका ट्याङ्करबाट डिजेल निकालिरहेको अवस्थामा प्रहरीले करिब ३० लिटर डिजेलसहित तीनवटा ट्याङ्कर र एक जनालाई नियन्त्रणमा लिएको हो ।
लुम्बिनी प्रदेश प्रहरी कार्यालयबाट खटिएको टोली र वडा प्रहरी कार्यालय भैरहवाको संयुक्त टोलीले ट्याङ्करको सिल तोडिएको अवस्थामा पेट्रोलियम पदार्थ निकालिरहेको फेला पारेको थियो ।
प्रहरीका अनुसार घटनास्थलमा दुईवटा ट्याङ्कर फेला परेका थिए भने अर्को एउटा ट्याङ्कर घटनास्थलबाट भागेर फरार भएको थियो । प्रहरीले उक्त ट्याङ्करलाई पछ्याउँदै नियन्त्रणमा लिन सफल भएको जनाएको छ ।
नियन्त्रणमा लिइएका तीनवटै ट्याङ्कर र एक जना व्यक्तिमाथि थप अनुसन्धान भइरहेको प्रहरीले जनाएको छ।
