काठमाडौँ । भोटेकोशी बाढीका कारण सडक सञ्जालबाट विच्छेद भएको रसुवालाई नुवाकोट हुँदै जोड्न वैकल्पिक मार्ग निर्माणको प्रक्रिया अघि बढाइएको छ ।
पूर्वाधार विकास मन्त्रालयका अनुसार नुवाकोटको सूर्यगढी गाउँपालिका–२ तल्लो कुवापानीस्थित बिमिरेखोलादेखि रसुवाको नौकुण्ड गाउँपालिका–५ वहाखोलासम्म जोड्ने गरी फलाँखु खोलामा ७५ मिटर लामो बेलीब्रिज निर्माण गर्न लागिएको हो ।
रसुवा सडक सञ्जालबाट विच्छेद हुँदा आवतजावत तथा अत्यावश्यक सामग्रीको ढुवानीमा समस्या भएपछि सम्बन्धित पालिका अध्यक्षबाट आएको अनुरोधअनुसार मन्त्रालयले बेलीब्रिज निर्माणका लागि आवश्यक निर्देशन तथा सहजीकरण गरिरहेको जनाएको छ ।
बेलीब्रिज निर्माण सम्पन्न भएपछि नुवाकोट र रसुवा जोड्ने सबैभन्दा छोटो वैकल्पिक सडक मार्ग तयार हुने मन्त्रालयको भनाइ छ । उक्त मार्गबाट फलाँखु खोलाबाट विदुर करिब २३ किलोमिटर र रसुवाको सदरमुकाम धुन्चे करिब ३५ किलोमिटरको दूरीमा पुग्न सकिनेछ ।
बाढीका कारण रसुवाको सडक सम्पर्क प्रभावित भइरहेका बेला प्रस्तावित बेलीब्रिजले आवतजावत र सामान ढुवानी सहज बनाउन महत्वपूर्ण सहयोग पुग्ने अपेक्षा गरिएको छ।
