काठमाडौं । नेपाली कांग्रेसले विपद् व्यवस्थापन, राहत, उद्धार तथा पुनःस्थापनाको काम प्रभावकारी र पारदर्शी बनाउन संसदीय उच्चस्तरीय समिति गठन गर्न माग गरेको छ ।
कांग्रेस संसदीय दलका नेता भीष्मराज आङ्देम्बेले मंगलबार सभामुख डोलप्रसाद अर्याललाई भेटेर विपद्पछिको अवस्थाबारे संसदीय उच्चस्तरीय समिति गठन गर्न ध्यानाकर्षण गराउनुभएको हो ।
भेटमा नेता आङ्देम्बेले विपद् आएको १७–१८ दिन बितिसक्दा पनि सर्वदलीय बैठकमा उठाइएको संसदीय उच्चस्तरीय समिति गठनको विषय कार्यान्वयनमा आउन नसकेको बताउनुभयो । उहाँले राहत व्यवस्थापनदेखि प्रभावितको पुनःस्थापनासम्मका कामलाई जिम्मेवार, पारदर्शी र व्यवस्थित बनाउन संसदीय समितिमार्फत सरकारका कामको अनुगमन र समन्वय आवश्यक रहेको बताउनुभयो ।
विपद् व्यवस्थापनमा राज्यका सबै निकाय र राजनीतिक दलबीच समन्वय आवश्यक रहेको भन्दै उहाँले संसदीय उच्चस्तरीय समिति गठन गर्नु सरकारको विपक्षमा उभिनु नभएको स्पष्ट पार्नुभयो । सरकारका कामलाई थप व्यवस्थित, जिम्मेवार र प्रभावकारी बनाउन संसदीय निगरानी आवश्यक रहेको उहाँको भनाइ थियो ।
उहाँले विपद्बाट प्रभावित बालबालिका, सुत्केरी महिला तथा अन्य पीडितको अवस्था, सुरक्षित पुनःस्थापना र राहतका लागि प्राप्त सहयोगको सदुपयोगबारे समितिले अनुगमन गर्नुपर्ने बताउनुभयो । प्रभावितलाई नयाँ बस्तीमा कहाँ र कसरी सुरक्षित रूपमा बसोबास गराउने भन्ने विषयमा पनि जिम्मेवारीपूर्ण र पारदर्शी ढंगले काम गर्नुपर्नेमा उहाँले जोड दिनुभयो ।
नेता आङ्देम्बेले सर्वदलीय बैठकमा विपत्तिपछि सर्वदलीय ढंगबाट अनुगमन गर्ने, आवश्यक निर्देशन दिने, पारदर्शिता कायम गर्ने तथा पुनःस्थापनाको कामलाई गम्भीरतापूर्वक अघि बढाउने निर्णय भए पनि त्यसअनुसार समिति गठन हुन नसकेको बताउनुभयो ।
उहाँले विपत्तिको समयमा राज्य पीडितको साथमा रहेको अनुभूति दिलाउन पनि संसदीय उच्चस्तरीय समिति आवश्यक रहेको बताउनुभयो ।
त्यसैगरी, नेता आङ्देम्बेले प्रधानमन्त्रीसँग हुने प्रश्नोत्तर कार्यक्रम तत्काल सञ्चालन गर्न पनि सभामुखको ध्यानाकर्षण गराउनुभएको छ । संसद्को नियमावली र कार्यतालिकाअनुसार प्रधानमन्त्रीसँगको प्रश्नोत्तर कार्यक्रम संसद् र कार्यकारीबीच प्रत्यक्ष संवादको महत्वपूर्ण माध्यम भएकाले यसलाई तत्काल सञ्चालन गर्नुपर्ने उहाँको भनाइ थियो ।
सभामुख अर्याल यस विषयमा सकारात्मक रहेको र प्रधानमन्त्रीसँगको प्रश्नोत्तर कार्यक्रम चाँडै सञ्चालन गर्ने तयारीबारे जानकारी गराएको नेता आङ्देम्बेले बताउनुभयो ।
भेटका क्रममा उहाँले नेपाली कांग्रेसको १५औँ महाधिवेशनको कार्यतालिकाबारे पनि सभामुखलाई जानकारी गराउनुभएको थियो । उहाँका अनुसार कांग्रेसको वडा अधिवेशन ३ र ४ गते, प्रदेश तथा क्षेत्रीय अधिवेशन १० गते र केन्द्रीय महाधिवेशन १६ देखि १९ गतेसम्म हुने तय भएको छ ।
