काठमाडौं । अर्थमन्त्री डा. स्वर्णिम वाग्लेले नेपाललाई वित्तीय कारबाही कार्यदल (एफएटीएफ)को जोखिमपूर्ण मुलुकको सूची ‘ग्रे लिस्ट’बाट बाहिर निकाल्न सरकारले भगीरथ प्रयास गरिरहेको बताउनुभएको छ ।
शुक्रवार नेपाल आर्थिक पत्रकार समाज (सेजन)को २८औँ साधारणसभामा बोल्दै अर्थमन्त्री वाग्लेले नेपाललाई चाँडोभन्दा चाँडो ग्रे लिस्टबाट बाहिर निकाल्न अन्तर्राष्ट्रिय समुदायमा समेत पहल भइरहेको बताउनुभयो ।
उहाँले नेपालको पक्षलाई प्रभावकारी रूपमा प्रस्तुत गर्न राष्ट्र बैंकका डेपुटी गभर्नर, महान्यायाधिवक्ता कार्यालयका सहमहान्यायाधिवक्तासहित ५–६ जनाको विशेष टोली परिचालन गरिएको जानकारी दिनुभयो । उक्त टोली हाल मलेसियामा रहेर नेपालको पक्षमा काम गरिरहेको उहाँले बताउनुभयो ।
अर्थमन्त्री वाग्लेले एफएटीएफकै विषयमा अमेरिकी अर्थमन्त्रीसँग आफूले भेट गर्ने प्रयास गरिरहेको समेत बताउनुभयो । नेपाल समयमै ग्रे लिस्टबाट बाहिरिन नसके त्यसको प्रत्यक्ष असर मुलुकको अन्तर्राष्ट्रिय वित्तीय विश्वसनीयता, करेस्पोन्डेन्ट बैंकिङ, लगानीको वातावरण र पुँजी प्रवाहमा पर्ने उहाँको भनाइ छ ।
उहाँले ग्रे लिस्टबाट बाहिरिन सरकारले गरिरहेको प्रयासबारे विभिन्न अफवाह फैलाउने काम भइरहेको भन्दै त्यसप्रति जिम्मेवार भएर प्रस्तुत हुन सञ्चार क्षेत्रलाई आग्रह गर्नुभयो । वर्षौंदेखि टारिँदै आएका आवश्यक सुधारलाई सरकारले ‘बोल्ड’ रूपमा अघि बढाइरहेको भन्दै त्यस क्रममा आफूहरूले विभिन्न आलोचना र प्रहारसमेत सामना गरिरहेको उहाँले बताउनुभयो ।
अर्थमन्त्री वाग्लेले प्राकृतिक विपद्बाट भएको क्षति र पुनर्निर्माणका लागि अन्तर्राष्ट्रिय वित्तीय स्रोत परिचालनमा पनि सरकार केन्द्रित रहेको बताउनुभयो । पुनर्निर्माणलाई पुरानै संरचना पुनःनिर्माण गर्ने अवसरका रूपमा मात्र नभई जलवायु उत्थानशील पूर्वाधार निर्माण गर्ने अवसरका रूपमा उपयोग गर्ने सरकारको नीति रहेको उहाँले स्पष्ट पार्नुभयो ।
उहाँले भन्नुभयो, “एफएटीएफको ग्रे लिस्टबाट नेपाललाई निकाल्न हाम्रो भगीरथ प्रयास चलिरहेको छ । अहिले म यहाँ बोल्दाबोल्दै मलेसियामा हाम्रो टोलीले काम गरिरहेको छ । नेपालको पक्षलाई जबर्जस्त ढङ्गले प्रस्तुत गर्नुपर्छ भनेर हामी लागिरहेका छौँ ।”
अर्थमन्त्री वाग्लेले मुलुकको आर्थिक समृद्धिका लागि सरकार निजी क्षेत्रलाई सँगै लिएर अघि बढ्न चाहेको बताउनुभयो । लगानीमैत्री वातावरण निर्माण गर्न आफू अर्थमन्त्री भएकै दिनदेखि नीतिगत सुधारको काममा लागेको उहाँको भनाइ छ ।
