काठमाडौं । नेपाली कांग्रेसका सभापति गगनकुमार थापाले पार्टीको १५औँ महाधिवेशनमा कुनै पनि नेता तथा कार्यकर्तालाई सहभागी हुनबाट वञ्चित नगरिएको बताउनुभएको छ ।
शुक्रबार काठमाडौंमा आयोजित कार्यक्रममा बोल्दै सभापति थापाले महाधिवेशनमा पार्टीका सबै नेता तथा कार्यकर्ताले सहभागी हुन पाउने र प्रतिस्पर्धाबाट नेतृत्व चयन हुने बताउनुभयो । उहाँले महाधिवेशन निर्धारित कार्यतालिकाअनुसार नै सम्पन्न हुने दाबी गर्नुभयो ।
सभापति थापाका अनुसार असोज ४ गतेदेखि कांग्रेसको अधिवेशन प्रक्रिया सुरु हुनेछ भने असोज १६ गतेदेखि केन्द्रीय महाधिवेशन प्रक्रिया प्रारम्भ हुनेछ । निर्धारित समयमै महाधिवेशन सम्पन्न गर्ने तयारी भइरहेको उहाँले बताउनुभयो ।
महाधिवेशनमा प्रतिस्पर्धा हुने भए पनि प्रतिस्पर्धाबाट जिम्मेवारी नपाएका नेताहरूलाई समेत समेटेर पार्टीलाई एकताबद्ध बनाउनुपर्नेमा सभापति थापाले जोड दिनुभयो । महाधिवेशनले पार्टीभित्रका विषय व्यवस्थापन गरे पनि नागरिकसँग टुटेको विश्वास पुनःस्थापित गर्नु कांग्रेसको मुख्य चुनौती रहेको उहाँको भनाइ छ ।
उहाँले महाधिवेशन सम्पन्न भएपछि कांग्रेस देशव्यापी अभियानसहित नागरिकमाझ जाने बताउनुभयो । दशैँलगत्तै ७७ वटै जिल्लामा पुगेर गाउँगाउँसम्म पार्टी र नागरिकबीचको सम्बन्ध पुनःस्थापित गर्ने अभियान सञ्चालन गरिने उहाँले जानकारी दिनुभयो ।
सभापति थापाले भन्नुभयो, “असोज ४ गतेबाट हाम्रो अधिवेशनको प्रक्रिया प्रारम्भ हुन्छ र १६ गतेबाट हामी केन्द्रीय महाधिवेशन प्रारम्भ गर्छौँ । समयमा महाधिवेशन सम्पन्न गर्छौँ । सबै साथीहरूले महाधिवेशनमा भाग लिनुहुन्छ । कोही साथीलाई महाधिवेशनमा भाग लिने कुराबाट वञ्चित गरिएको छैन ।”
महाधिवेशनमा हुने प्रतिस्पर्धालाई पार्टीभित्रको स्वाभाविक प्रक्रिया भएको उल्लेख गर्दै उहाँले प्रतिस्पर्धाबाट जिम्मेवारी पाउने र नपाउने दुवै पक्षलाई समेटेर कांग्रेसलाई एकताबद्ध बनाउनुपर्ने बताउनुभयो ।
पार्टीभित्र देखिएका समस्यामै अल्झिरहँदा नागरिकसँगको सम्बन्ध झनै कमजोर हुनेतर्फ कांग्रेस गम्भीर रहेको पनि उहाँले बताउनुभयो । “अधिवेशनले अहिले पार्टीभित्रको कुरा मात्रै मिलाउँछ । नागरिकसँगको विश्वास पुनःस्थापित गर्नुपर्नेछ,” उहाँले भन्नुभयो ।
महाधिवेशनपछि कांग्रेस नागरिकसँगको सम्बन्ध पुनःस्थापित गर्ने यात्रामा अघि बढ्ने र त्यसका लागि देशभर अभियान सञ्चालन गर्ने उहाँको भनाइ छ।
