काठमाडौं । राष्ट्रिय स्वतन्त्र पार्टी (रास्वपा)की सांसद विदुषी राणाले हिमाल तथा हिमनदीको निगरानी, सीमापार पूर्वसूचना प्रणाली र जलवायु अनुकूलनका संरचना निर्माणलाई राष्ट्रिय प्राथमिकता बनाउन सरकारसँग माग गर्नुभएको छ ।
प्रतिनिधिसभाको बुधबारको बैठकमा बोल्दै सांसद राणाले विश्वव्यापी जलवायु परिवर्तनका कारण हिमनदी पग्लिने क्रम तीव्र बन्दै गएको भन्दै हिमाल तथा हिमनदीको संरक्षण र नियमित निगरानीमा सरकारले विशेष ध्यान दिनुपर्ने बताउनुभयो ।
उहाँले रसुवाको भोटेकोशीमा आएको विनाशकारी बाढीलाई एउटा विपद्को घटनाका रूपमा मात्र हेर्न नहुने बताउँदै यो हिमालयले दिएको चेतावनी भएको उल्लेख गर्नुभयो ।
वैज्ञानिक अध्ययनलाई उद्धृत गर्दै सांसद राणाले हिन्दुकुश हिमालय क्षेत्रमा सन् २००० यता हिमनदी पग्लिने गति झन्डै दोब्बर भएको बताउनुभयो । हालकै उत्सर्जनको क्रम जारी रहे यस शताब्दीको अन्त्यसम्म हिमनदीको आयतन ८० प्रतिशतसम्म गुम्न सक्ने चेतावनीसमेत उहाँले दिनुभयो ।
नेपालको हरितगृह ग्यास उत्सर्जनमा योगदान न्यून भए पनि जलवायु परिवर्तनको असर भने नेपालले ठूलो मूल्य चुकाएर व्यहोर्नुपरेको उहाँको भनाइ थियो ।
उहाँले भन्नुभयो, ‘रसुवाको विनाशकारी बाढी केवल एउटा दुर्घटना होइन । यो हिमालयले हामीलाई दिएको एउटा चेतावनी हो ।’
सांसद राणाले हिमनदी र हिमालको रियल टाइम मोनिटरिङ, क्रस बोर्डर अर्ली वार्निङ सिस्टम तथा जलवायु अनुकूलन संरचना निर्माणलाई राष्ट्रिय प्राथमिकता बनाउनुपर्नेमा जोड दिनुभयो ।
उहाँले जलवायु परिवर्तनबाट नेपालले भोगिरहेको क्षतिका लागि सरकारले अन्तर्राष्ट्रियस्तरमा जलवायु न्यायको विषयलाई प्रभावकारी रूपमा उठाउनुपर्ने र यसका लागि कूटनीतिक पहललाई समेत तीव्रता दिनुपर्ने बताउनुभयो ।
