काठमाडौँ। काठमाडौँ महानगरपालिकाका कार्यवाहक प्रमुख सुनिता डङ्गोलले नागरिकमैत्री शासन र भ्रष्टाचारमा शून्य सहनशीलतामार्फत जेनजी सहिदको सपना पूरा गर्न प्रतिबद्ध रहेको बताउनुभएको छ ।
जेनजी सहिद दिवसको सन्दर्भमा उहाँले गत वर्ष भदौ २३ गते सुशासन र भ्रष्टाचार मुक्त शासनको मुद्धा अघि सारेर गरिएको आन्दोलन र त्यसअघिका राजनीतिक आन्दोलनबाट सहादत प्राप्त गरेका सहिद र घाइतेप्रति सम्मान प्रकट गर्दै आफू र कामपाको तर्फबाट प्रतिबद्धता व्यक्त गर्नुभयो ।
“स्वाधीनता, स्वाभिमान र नागरिक अधिकार प्राप्तिका लागि वि.सं.१९९७ देखि गत वर्षको आन्दोलनसम्मका विभिन्न कालखण्डमा अनेकौँ राजनीतिक क्रान्ति र सङ्घर्ष भएका छन् । आज हामीले उपभोग गरिरहेको लोकतान्त्रिक र सङ्घीय शासन व्यवस्था यिनै महान आन्दोलनको जगमा उभिएको उपलब्धि हो”, डङ्गोलले भन्नुभयो ।
व्यक्तिगत स्वार्थ, पारिवारिक मोह र सुखसयल त्यागेर नागरिक शासनका लागि जीवन उत्सर्ग गर्ने सम्पूर्ण सहिदप्रति श्रद्धाञ्जली अर्पण गर्दै डङ्गोलले आन्दोलनका क्रममा घाइते हुनुभएका तथा प्रजातन्त्र र परिवर्तनका लागि जीवन समर्पित गर्नुहुने सम्पूर्ण योद्धा र अग्रजप्रति उच्च सम्मान व्यक्त गर्नुभयो ।
“काठमाडौँ हरेक ऐतिहासिक परिवर्तनको प्रत्यक्ष साक्षी हो । शासनसत्ता नागरिकको हित र सेवाका लागि हुनुपर्छ भन्ने सन्देश काठमाडौँले सधैँ प्रवाह गर्दै आएको छ । हामी सरकारी सेवालाई झन्झटमुक्त, प्रविधिमैत्री र नागरिकको घरदैलोसम्म पुर्याउने ‘नागरिकमैत्री शासन’ स्थापना गर्न प्रतिबद्ध छौँ । स्वास्थ्य, शिक्षा, खानेपानी र स्वच्छ वातावरण जस्ता मौलिक तथा नैसर्गिक अधिकारको पूर्ण प्रत्याभूति गराउन हामी दृढताका साथ अगाडि बढिरहेका छौँ । हरेक नागरिकले आत्मसम्मानका साथ बाँच्न पाउने विभेदरहित समाज निर्माण हाम्रो मूल लक्ष्य हो”, उहाँले भन्नुभयो ।
आफूहरू सहिदले देखाएको बाटो पछ्याउँदै हिँडेको बताउँदै कार्यवाहक प्रमुख डङ्गोलले स्थानीय अर्थतन्त्रको प्रवद्र्धन र पूर्वाधार विकासमार्फत नागरिकको जीवनस्तरमा सकारात्मक परिवर्तन ल्याउन ‘जेनजी’ आन्दोलन लगायतका विभिन्न सङ्घर्षबाट प्राप्त जनमत पूरा गर्न निरन्तर लागिपरेको उल्लेख गर्नुभयो ।
उहाँले परिवर्तन केवल शब्दमा मात्र होइन, नागरिकको दैनिक जीवनमा देखिनुपर्नेमा आफू सचेत रहेको स्पष्ट पार्नुभयो । सहिदले देखाउनुभएको बाटो नागरिकले हामीमाथि गर्नुभएको भरोसा हाम्रो मार्गदर्शन हो । “यही मार्गमा अविचलित भई हिँड्दा मात्रै कलिलो उमेरमा सहादत प्राप्त गर्ने जेनजी सहिदको आत्माले चीरशान्ति पाउनेछ भन्ने हाम्रो अटल विश्वास छ”, उहाँले भन्नुभयो । रासस
