काठमाडौं । सरकारले बाढीका कारण क्षतिग्रस्त सडक तथा पुल सञ्चालनमा ल्याउन भारत र चीनसँग बेलिब्रिज माग गरेको छ।
बेलिब्रिज उपलब्ध गराइदिन आग्रह गर्दै परराष्ट्र मन्त्रालयले भारत र चीन सरकारलाई पत्राचार गरेको हो। बुधबार रसुवामा आएको विनाशकारी बाढीका कारण विभिन्न जिल्लामा सडक तथा पुलमा ठूलो क्षति पुगेपछि तत्काल यातायात सञ्चालनका लागि अस्थायी पुलको आवश्यकता परेको हो।
बाढीका कारण रसुवा, नुवाकोट, धादिङलगायत जिल्लामा गरी ४१ वटा पुल पूर्ण रूपमा क्षतिग्रस्त भएको प्रारम्भिक विवरण छ। पुलहरू बगाएपछि धादिङ जाने मुख्य सडकसहित विभिन्न सडकखण्डमा यातायात प्रभावित भएको छ।
चीनसँग जोडिने रसुवागढी नाकाको पुलसमेत बाढीले बगाएको छ। त्यस्तै नुवाकोटको त्रिशूली क्षेत्रमा रहेको पुललगायत अन्य स्थानका पुल तथा सडक संरचनामा पनि क्षति पुगेको छ।
बाढीबाट क्षतिग्रस्त संरचनाका कारण प्रभावित क्षेत्रमा उद्धार, राहत तथा अत्यावश्यक सामग्रीको आवतजावतमा समेत कठिनाइ भइरहेको छ। त्यसैले सरकारले तत्काल यातायात सञ्चालन सहज बनाउन वैकल्पिक तथा अस्थायी पुल निर्माणलाई प्राथमिकता दिएको हो।
सरकारले बाढीबाट क्षतिग्रस्त पूर्वाधारको पुनःस्थापना तथा प्रभावित क्षेत्रमा आवागमन सहज बनाउन छिमेकी मुलुकसँग आवश्यक सहयोगका लागि समन्वय गरिरहेको जनाएको छ।
