काठमाडाैँ । मनबहादुर सार्कीले बाँझो जमिन भाडामा लिएर व्यावसायिक अकबरे खेती सुरु गर्नुभएको छ । उहाँले वार्षिक ४५ हजारमा १५ रोपनी जग्गा भाडामा लिनुभएको हो । यतिखेर सार्की परिवारको जीवन गुजाराको आधार अकबरे खुर्सानी खेती बनेको छ ।
स्याङ्जाको वालिङ नगरपालिका–१३ रियालेका बाँदरले नखाने, बजार मूल्य राम्रो भएको र खेती गर्न सरल हुने भएकाले उहाँले अकबरे खुर्सानीको व्यावसायिक खेती गर्नुभएको हो । “१५ रोपनी जग्गामा १५ हजार अकबरेका बोटहरु लगाएको छु,” उहाँले भन्नुभयो, “अहिले त आम्दानी लिन थालिसकेको छु ।”
उहाँले साउन मसान्तसम्म ८०० केजी खुर्सानी प्रतिकेजी २०० का दरले बिक्री गर्दै आउनुभएको छ । बारीमा एक हजार २०० केजी खुर्सानी टिप्न बाँकी छ । उहाँले छोटो अवधिमा खुर्सानी बिक्रीबाट रु एक लाख ६० हजार आम्दानी गर्नुभएको छ ।
“यहाँ उत्पादन भएको खुर्सानी बिक्रीका लागि अहिलेसम्म बजारको समस्या छैन,” उहाँले भन्नुभयो, “खुर्सानी स्थानीय बजार तथा पोखराका बजारमा बिक्री हँुदै आएको छ ।”
चार वर्ष वैदेशिक रोजगारीको सिलसिलामा मलेसियामा काम गर्नुभएका उहाँले आफ्नै गाउँ ठाउँमा फर्केर व्यावसाय गर्ने क्रममा खुर्सानी खेती रोज्नुभएको हो । बाँझो रहेको जमिनको सही सदुपयोग गर्न सकेको खण्डमा आम्दानी गर्न सकिन्छ भन्ने उदाहरणका रुपमा उहाँलाई लिन सकिन्छ ।
