काठमाडौँ। बिहीवार रातिदेखि परेको अविरल वर्षाका कारण कास्कीको अन्नपूर्ण गाउँपालिकाका विभिन्न क्षेत्रमा ठूलो भौतिक क्षति पुगेको छ ।
विशेषगरी गाउँपालिकाको वडा नम्बर ८ स्थित वीरेठाँटी क्षेत्र बाढी र कटानबाट बढी प्रभावित भएको छ । कास्की प्रहरीकाअनुसार मोदी खोलामा आएको बाढीले वीरेठाँटीबाट पर्यटकीय क्षेत्र घान्द्रुक जाने सडकका विभिन्न खण्डहरू बगाएको छ ।
वीरेठाँटी नजिकैको करिव १०० मिटर सडकखण्ड मोदी खोलाले कटान गरेपछि उक्त क्षेत्रको यातायात पूर्ण रूपमा ठप्प भएको छ । सडकको जग नै बगाएका कारण पैदल यात्रीका लागिसमेत आवतजावत गर्ने बाटो बाँकी नरहेको प्रहरीले जनाएको छ ।
यसैगरी, बाढीले कास्की र पर्वतको सिमानामा पर्ने मोदी खोलामा एउटा पुल र एक मन्दिर समेत बगाएको छ । खोलाको बहाव बढेपछि सो क्षेत्रमा तीनजना व्यक्तिहरू अड्किएको र उनीहरूको उद्धारका लागि पहल भइरहेको बताइएको छ ।
वर्षा नरोकिएका कारण मोदी खोलाको सतह बढ्ने क्रम जारी रहेको र सडक सञ्जाल विच्छेद हुँदा त्यस क्षेत्रको जनजीवन प्रभावित बनेको छ ।
सुरक्षा निकायले सो क्षेत्रमा शतर्कता अपनाउन र बाढीग्रस्त क्षेत्रमा नजान सर्वसाधारणलाई आग्रह गरेको छ । –न्युज एजेन्सी नेपाल
