काठमाडौँ । जनआस्था साप्ताहिकका सम्पादक किशोर श्रेष्ठको निवासमा प्रहरीले छापा मारेको छ । हिजो राति उनको नख्खुस्थित घरमा प्रहरीले छापा मारेको छ ।
जनआस्था अनलाइन संस्करणका सम्पादक राजेन्द्र रिमालका अनुसार प्रहरीले हिजो राति सम्पादक श्रेष्ठलाई पक्राउ गरेपछि घरमा पनि पुगेको थियो । त्यसपछि सम्पादक श्रेष्ठले प्रयोग गर्ने ल्यापटप र उहाँको परिवारका सदस्यको मोबाइल पनि बरामद गरेको थियो ।
त्यसैगरी आज बिहान जनआस्थाको कार्यालय सानेपामा प्रहरी पुगेर खानतलासी गरेको छ । सम्पादक रिमालले प्रहरीले कार्यालयमा खानतलासी गरेको जानकारी दिए । उनका अनुसार प्रहरीले कार्यालयका महत्वपूर्ण दस्ताबेज र पत्रिकाका प्रतिहरुसमेत लिएर गएको छ ।
सम्पादक श्रेष्ठलाई हिजो मात्र प्रहरीले नियन्त्रणमा लिएको थियो । उनी अहिले प्रहरी हिरासतमै छन् । समाचारसँग सम्बन्धित विषयलाई लिएर उनलाई पक्राउ गरिएको हो ।
