काठमाडौं । स्वास्थ्यमन्त्री उपेन्द्र यादवले डेंगु नेपालको मात्र नभई विश्वकै समस्या भएको बताएका छन् । बुधबार संसदलाई सम्बोधन गर्दै डेंगुको औषधी नभएको भन्दै उनले यसको नियन्त्रणका लागि डेंगु सार्ने लामखुट्टेको नियन्त्रण नै प्रमुख उपाय भएको बताएका हुन् ।
मन्त्री यादवले यस्ता रोग व्यवस्थापनमा सफलता मिलिरहेको भन्दै अहिले नै आपतकालिन अवस्था घोषणा गर्नु नपर्ने र डेंगु रोकथामका लागि सरकारले गरिरहेको प्रयासबारे पनि उनले जानकारी गराएका हुन् ।
८५ स्थानीय तहमा डेंगु नियन्त्रणका लागि १ करोड ६६ लाख रकम र प्रदेशमा डेंगु लगायतका प्रकोप गराउने रोग नियन्त्रणमका लागि ६ करोड १७ लाख पठाइसकिएको मन्त्री यादवले जानकारी दिए । स्थानीय र प्रदेश सरकारले समेत त्यस्ता प्रभावित क्षेत्रमा खोज र नष्ट गर अभियान सञ्चालन गरिरहेको पनि मन्त्री यादवले बताए ।
मन्त्री यादवले हाल ५६ जिल्लामा साउन १ देखि भदौ ३० सम्म ५ हजार ९५ संंक्रमित भइसकेको र ६ जनाको मृत्यु भएको जानकारी दिए । विश्वमा प्रत्येक वर्ष ३९ करोड मानिसमा डेंगुको संक्रमण देखिएको र विश्व स्वास्थ्य संगठनले समेत विश्वको दश प्रमुख खतरामध्ये डेंगुलाई पनि एक मानेको बताए ।
देशभर डेंगुले आतंक मच्चिँदा पनि स्वास्थ्यमन्त्री मौन रहेको भन्दै सांसदहरुले आलोचना गर्दै आएका थिए ।
