इन्डोनेसिया। आइतबार इन्डोनेसियाली समुद्रमा डुङ्गामा आगो लाग्दा दर्जनौँ व्यक्तिको हताहत कम्तीमा पाँच जनाको मृत्यु भएको छ ।
डुङ्गामा आगलागीपछि आत्तिएर यात्रुहरू समुद्रमा हाम फालेपछि पाँच जनाको मृत्यु भएको र अन्य ४१ जना बेपत्ता भएका खोज तथा उद्धार अधिकारीहरूले बताएका छन् ।
क्षेत्रीय सुराबाया खोज तथा उद्धार निकायले दिउँसोको अपडेटमा पछिल्लो तथ्याङ्क दिँदै भनेको छ, “जहाजमा सवार पाँच जनाको मृत्यु भएको, ४१ जना वेपत्ता भएका र २२५ जनालाई उद्धार गरिएको छ ।”
इन्डोनेसियाको राष्ट्रिय खोज तथा उद्धार निकाय (बासारनास) का अनुसार डुङ्गामा आगलागीपछि केही यात्रु आत्तिएर समुद्रमा हाम फालेका थिए र नजिकैको जहाजले उनीहरूलाई समूद्रबाट उद्धार गरेको थियो ।
चार अन्य जहाज डुङ्गा नजिकै तयारी अवस्थामा थिए तर डुङ्गामा रहेको ज्वलनशील सामग्रीको जोखिमका कारण नजिक जान असम्भव भएको बासारनासले जानकारी गराएको छ।
बासारनासले डुङ्गाका क्याप्टेनले कम्पनीलाई आगोको रिपोर्ट गर्दै भन्नुभएको थियो, “डुङ्गा पूर्वी जाभाको सुराबायाबाट दक्षिण सुलावेसीको मकास्सरतर्फ जाँदै गर्दा आगलागी भएको छ ।”
बासारनासले त्यसपछि क्याप्टेनसँग सम्पर्क नभएको बताएको छ। घटनास्थलबाट छ घण्टाको दूरीमा रहेको सुराबायाबाट ठूलो उद्धार टोली घटनास्थलतर्फ जाँदै छ ।
“क्षेत्रबाट आएका प्रारम्भिक रिपोर्टअनुसार, यात्रुहरूले घटनास्थल नजिकका जहाजहरूबाट उद्धारको प्रतीक्षा गरिरहेका र अधिकांशको उद्धार गर्न सफल भएको यातायात मन्त्रालयका वरिष्ठ अधिकारी मुहम्मद मस्युदले बताउनुभएको छ ।
उहाँले भन्नुभयो, “यात्रु र चालक दलको सुरक्षा हाम्रो सर्वोच्च प्राथमिकता हो। उद्धार प्रक्रिया छिटो, सुरक्षित र प्रभावकारी रूपमा अगाडि बढोस् भन्नका लागि हामी सबै सम्बन्धित पक्षसँग निरन्तर समन्वय गर्दै छौँ ।”
इन्डोनेसियामा समुद्री दुर्घटना नियमित रूपमा हुने गर्छ । यो १७ हजार भन्दा बढी टापु भएको द्वीपसमूह हो र आंशिक रूपमा कमजोर सुरक्षा मापदण्ड तथा अप्रत्याशित मौसमका कारण यस्ता घटना हुने गर्छन् ।
गत महिना सेलायर नजिकै ७० भन्दा बढी यात्रु बोकेको डुङ्गा डुबेको थियो । सेलायर ग्रेट सुलावेसीको दक्षिणमा रहेको सानो उष्णकटिबन्धीय टापु हो । (रासस/एएफपी)
