काठमाडौँ। पूर्वराष्ट्रपति डा. रामवरण यादवले राष्ट्रिय एकता र सामाजिक सद्भाव कायम राख्न अपिल गर्नुभएको छ ।
मुलुकको पछिल्लो परिस्थितिलाई लिएर गम्भीर चिन्ता व्यक्त गर्दै उहाँले राष्ट्रिय एकता र सामाजिक सद्भाव कायम राख्न अपिल गर्नुभएको हो ।
राष्ट्रपति रामचन्द्र पौडेलले वर्तमान समसामयिक विषयमा छलफल गर्न आयोजना गर्नुभएको भेटघाटपछि न्युज एजेन्सी नेपालसँग कुरा गर्दै डा. यादवले भौगोलिक, जातीय, धार्मिक र सांस्कृतिक विविधताको रक्षा गर्दै सबै नेपाली एकतावद्ध हुनुपर्नेमा जोड दिनुभयो ।
शितल निवासमा भएको उक्त छलफलमा पूर्वराष्ट्रपति यादवसहित पूर्वउपराष्ट्रपति परमानन्द झा लगायत विशिष्ट पदाधिकारीहरूको सहभागिता रहेको थियो ।
पूर्वराष्ट्रपति यादवले सुनसरीमा दुई समुदायबीच भएको घटनापछि तराईका जिल्लामा भएको झडप र प्रदर्शनका घटनाहरूमा तीन जना नागरिकको मृत्यु भएकोमा दुःख व्यक्त गर्दै मृतकका परिवारप्रति सम्वेदना प्रकट गर्नुभयो ।
उहाँले राज्यका निकायहरूले समयमै सही सूचना प्राप्त गरी व्यवस्थापन गर्न नसक्दा यस्ता अप्रिय घटना हुने गरेको उल्लेख गर्नुभयो । सरकारको कार्यशैलीप्रति टिप्पणी गर्दै डा. यादवले राज्यले सबै राजनीतिक दल, नागरिक समाज र धार्मिक अगुवाहरूलाई विश्वासमा लिएर अघि बढ्नुपर्ने सुझाव दिनुभयो ।
उहाँले भन्नुभयो, ‘अहिलेको डिजिटल र सामाजिक सञ्जालको युगमा सही सूचनासँगै गलत सूचना पनि छिटो प्रवाह हुन्छ । यस्तो अवस्थामा राज्यले समयमै प्रभावकारी कदम चाल्न सकेको भए स्थिति नियन्त्रणमा रहने थियो । हाम्रो भूगोल र समुदायमा विविधता छ, तर सबैभन्दा पहिले हामी नेपाली हौँ । राष्ट्रको हित नचाहने तत्वहरूले कहिलेकाहीँ यस्तो विविधतामा खेल्ने प्रयास गर्छन्, जसमा हामी सचेत हुनुपर्छ । विविधतामा एकता नै हाम्रो शक्ति हो । राज्यले यो शक्तिलाई पहिचान गरी सबै पक्षलाई एकजुट बनाउने कौशल देखाउनुपर्छ । बल प्रयोग गर्नुभन्दा पनि संयमता र समन्वयका साथ समस्याको समाधान खोजिनुपर्छ ।’
संविधानको रक्षा र राष्ट्रिय एकता सुदृढ बनाउनु सबै नागरिकको साझा जिम्मेवारी भएको बताउँदै उहाँले कुनैपनि बहानामा सामाजिक विखण्डन हुन नदिन आग्रह गर्नुभयो ।
संकटको घडीमा सरकारलाई मात्र दोष नदिएर समुदाय र सचेत नागरिकले पनि शान्ति र अमनचयन कायम गर्न रचनात्मक भूमिका निर्वाह गर्नुपर्ने उहाँको भनाइ छ ।
राष्ट्रपति पौडेलको राष्ट्रिय एकता र सद्भावप्रतिको चिन्तालाई समर्थन गर्दै डा. यादवले देशमा शान्ति स्थापनाका लागि सबै नेपालीलाई एकतावद्ध भएर अगाडि बढ्न आह्वान गर्नुभएको छ ।– न्युज एजेन्सी नेपाल
