काठमाडौँ। जापानमा हुने २०औँ एसियाली खेलकुदमा सहभागी हुने स्केटिङ खेलाडीले थाइल्यान्डको बैंककमा तयारी प्रशिक्षण गर्ने भएका छन् ।
एसियाडमा भाग लिने दुई पुरुष खेलाडी गजेन्द्र बर्देवा र शरदकुमार राई शुक्रबार बैंकक प्रस्थान गर्नेछन् ।
आगामी असोज ३ गतेदेखि सुरु हुने एसियाडमा दुवैले स्ट्रिट विधामा नेपालको चुनौती प्रस्तुत गर्नेछन् ।
उनीहरूले करिब एक महिना बैंककस्थित हुआ मक स्केट पार्कमा प्रशिक्षण गर्ने नेपाल स्केटिङ तथा स्केट बोर्डिङ सङ्घका महासचिव सत्य थापाले जानकारी दिनुभयो ।
उहाँले एकमहिने प्रशिक्षणपछि खेलाडीले त्यही प्रशिक्षणलाई निरन्तरता दिने वा नेपाल फर्कने अहिले टुङ्गो नलागेको बताउनुभयो ।
बैंककमा प्रशिक्षणलाई निरन्तरता दिने विषयमा पनि छलफल भइरहेको महासचिव थापाले बताउनुभयो ।
टोलीलाई राष्ट्रिय खेलकुद परिषद्का सदस्य-सचिव रामचरित्र मेहताले बिदाइ गर्दै खेलाडीलाई उच्च मनोबलका साथ एसियाडमा प्रतिस्पर्धा गर्ने आग्रह गर्नुभयो ।
उहाँले एसियाडमा सहभागी हुने खेलाडीको एक वर्षको बिमा गरिने बताउँदै खेलाडीलाई अधिकतम सुविधा दिने विषयमा पनि प्रयासरत रहेको उल्लेख गर्नुभयो । रासस
