राजविराज । संविधानसभाबाट संविधान जारी भएको दिनलाई मधेसकेन्द्रित दल राष्ट्रिय जनता पार्टी (राजपा) ले भने ‘कालो दिन’ का रुपमा मनाइरहेको छ। राजपाका नेता कार्यकर्ताले तराईका जिल्लामा संविधानको विरोध गर्दै कार्यक्रम गरेका हुन्।
यसबिच सप्तरीमा राजपाका महासचिव मनिष सुमनको नेतृत्वमा जिल्ला प्रशासन कार्यालय र नेपाल विद्युत प्राधिकरण, राजविराज वितरण केन्द्र लगायतका केही स्थानमा कालो झण्डा लगाउदा प्रहरीसँग झडपसमेत थियो।
कार्यालयको गेटमा कालो झन्डा गाड्दै हिँडेका राजपाका कार्यकर्ता कार्यालय हाताभित्रै प्रवेश गर्न खोजेपछि अवरोध गरिएको जिल्ला प्रहरी कार्यालय सप्तरीले जनाएको छ। सोही क्रममा सामान्य ठेलाठेल भएको प्रहरीको भनाइ छ।
प्रहरीले सबै कार्यालयको कालो झन्डा केही समयपछि नै हटाएको छ।
