काठमाडौं । राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले नागढुंगा–सिस्नेखोला सुरुङमार्गबाट पूर्वप्रधानमन्त्री केपी शर्मा ओलीको नाम हटाइएको विषयलाई लिएर टिप्पणी गर्नुभएको छ।
शाहीले सामाजिक सञ्जालमार्फत ‘हिजो तिमीहरूले राजाको इतिहास मेटायौ, आज अरूले तिमीहरूको इतिहास मेटाइदिए’ भन्दै विगतमा राजाको इतिहास मेटाउने र राजाका पालामा निर्माण भएका संरचनासँग जोडिएका नाम तथा इतिहास परिवर्तन गर्नेहरूलाई अहिलेको घटनाले जवाफ दिएको बताउनुभएको छ।
उहाँले विगतमा राजमार्गहरूको नामसमेत परिवर्तन गरिएको उल्लेख गर्दै राजाका पालामा बनेका संरचना र त्यससँग जोडिएको इतिहास योजनाबद्ध रूपमा मेटाउने प्रयास गरिएको दाबी गर्नुभएको छ।
शाहीले अहिले पूर्वप्रधानमन्त्री ओलीको नाम हटाइएको विषयमा दुःख मान्नुपर्ने कुनै कारण नरहेको समेत बताउनुभएको छ। उहाँले इतिहास मेटाउने प्रवृत्तिको परिणाम एक दिन आफ्नै इतिहासमाथि पनि पर्न सक्ने चेतावनी दिनुभएको छ।
आफ्नो भनाइलाई पुष्टि गर्न उहाँले एक पुरानो कथा समेत उल्लेख गर्नुभएको छ। वृद्ध आमालाई डोकोमा बोकेर भीरबाट फाल्न लैजाँदा छोराले डोको भने नराख्न आग्रह गरेको र भविष्यमा बुबा बूढो भएपछि त्यही डोको आवश्यक पर्ने बताएको कथा सुनाउँदै शाहीले इतिहास मेटाउनेहरूले भोलि आफ्नै इतिहास मेटिन सक्ने कुरा सम्झनुपर्ने बताउनुभएको हो।
‘आज अरूको इतिहास मेटाउने पालो तपाईंको होला, तर भोलि तपाईंको इतिहास मेटाउने अर्को कोही तयार भएर बसेको हुन सक्छ,’ शाहीले लेख्नुभएको छ।
