काठमाडौं । नेपाली कांग्रेस संसदीय दलका नेता भीष्मराज आङदेम्बेले पार्टी र संसद् दुवैमा विवेक र तर्क कमजोर हुँदै गएको बताउनुभएको छ ।
४४औँ बीपी स्मृति दिवसका अवसरमा बिहीबार आयोजित कार्यक्रममा बोल्दै उहाँले विवेक हराउँदा अहंकार र तर्क कमजोर हुँदा गालीगलौज हावी हुने अवस्था सिर्जना भएको बताउनुभयो ।
कांग्रेसभित्र पछिल्लो समय गालीगलौजमा उत्रिने प्रवृत्ति बढ्दै गएको भन्दै उहाँले पार्टी र संसद् दुवैमा तर्क र विवेकको अभाव देखिएको टिप्पणी गर्नुभयो । संसद्मा विवेक र तर्कको अभावका कारण जथाभावी निर्णय गर्ने र समस्या आएपछि त्यसलाई सच्याउने प्रवृत्ति देखिएको उहाँको भनाइ थियो ।
नेता आङदेम्बेले राजनीतिलाई नाफा–घाटाको हिसाबमा नभई जनताको सेवाको भावनाबाट अघि बढाउनुपर्नेमा जोड दिनुभयो । विगतमा राजनीति व्यवसायजस्तो बनेर नाफा–घाटाको हिसाबमा सञ्चालन भएको उल्लेख गर्दै उहाँले राजनीतिलाई निस्वार्थ सेवामा रूपान्तरण गर्नु वर्तमान नेतृत्वको जिम्मेवारी भएको बताउनुभयो ।
उहाँले भन्नुभयो, ‘जब विवेक हराउँछ, त्यो बिस्तारै अहंकारमा परिवर्तित हुँदो रहेछ । जब तर्क हराउँछ, त्यो गालीमा रूपान्तरित हुँदो रहेछ । विवेक र तर्क हराएर अहंकार र गालीमा परिवर्तित भएको अवस्था अहिले मेरो पार्टीको यथार्थता हो ।’
संसद्मा पनि यस्तै अवस्था रहेको उहाँले बताउनुभयो । ‘संसद्मा न तर्क छ, न विवेक छ । जे देख्यो त्यस्तै निर्णय गरिएको छ । विवेक गुमाएर अप्ठ्यारो परेपछि फेरि सही बाटोमा हिँड्ने प्रयास गरिएको छ,’ उहाँले भन्नुभयो ।
नेता आङदेम्बेले आजको राजनीति कार्यकर्ता, गरिब, निमुखा, श्रमजीवी, किसान र मजदुरको पक्षमा केन्द्रित हुनुपर्ने बताउनुभयो । राजनीतिलाई लगानीकर्ताको प्रतिफल र नाफा–घाटाको हिसाबबाट हेर्न नहुने उहाँको भनाइ थियो ।
उहाँले विवेक, तर्क, मर्यादा, इमान्दारिता र निष्ठालाई पुनः स्थापित गर्न नयाँ अभियान आवश्यक रहेको बताउनुभयो । बीपी कोइरालाको तस्बिर मात्र झुन्ड्याएर नभई उहाँका आदर्श र सिद्धान्तअनुसार पार्टी सञ्चालन गर्नुपर्नेमा उहाँले जोड दिनुभयो ।
