काठमाडौं । प्रधानमन्त्री वालेन्द्र शाहले नेपाल तयारी पोशाक उद्योग संघका पदाधिकारीसँग आज तयारी पोशाक उद्योगको वर्तमान अवस्था, समस्या तथा सुधारका उपायबारे छलफल गर्दै हुनुहुन्छ।
प्रधानमन्त्री तथा मन्त्रिपरिषद्को कार्यालयमा बिहान ११:३० बजे हुने छलफलमा संघका अध्यक्ष पशुपतिदेव पाण्डे, प्रथम उपाध्यक्ष बसन्तराज अधिकारी, महासचिव भीमकुमारी गिरी, प्रमुख कार्यकारी अधिकृत सुयश खनाल तथा प्राविधिक सल्लाहकार प्रकाशकुमार झा सहभागी हुनेछन्।
भेटवार्तामा तयारी पोशाक उद्योगले सामना गरिरहेका चुनौती, उत्पादन तथा निर्यात प्रवर्द्धन, रोजगारी सिर्जना र उद्योग क्षेत्रको समग्र विकासका विषयमा विस्तृत छलफल हुने जनाइएको छ।
प्रधानमन्त्री शाहले पछिल्ला दिनहरूमा निजी क्षेत्र, उद्योगी–व्यवसायी तथा विभिन्न सरोकारवाला निकायसँग निरन्तर संवादलाई प्राथमिकता दिँदै आउनुभएको छ।
सो क्रममा उहाँले उद्योग व्यवसायले भोगिरहेका समस्या, समाधानका उपाय तथा आवश्यक नीतिगत सुधारका विषयमा सुझाव संकलन गर्दै सम्बन्धित निकायलाई कार्यान्वयनका लागि आवश्यक निर्देशनसमेत दिँदै आउनुभएको छ।
