काठमाडाैँ । नेकपा (एमाले) का महासचिव शंकर पोखरेलले संसदीय दलका सदस्यहरूलाई उनीहरूको रुचि र विज्ञताका आधारमा जिम्मेवारी दिनुपर्ने बताउनुभएको छ ।
सबै सदस्यहरूको सबै विषयमा समान दक्षता नहुने उल्लेख गर्दै उहाँले विषयवस्तुको ज्ञान भएका व्यक्तिलाई प्राथमिकता दिँदा मात्र सदनमा पार्टीको उपस्थिति प्रभावकारी हुने बताउनु भयो । आईतवार पार्टी कार्यालय च्यासलमा आयोजित कार्यक्रममा बोल्दै महासचिव पोखरेलले विषयवस्तुमा दख्खल नभएका सदस्यहरूलाई जबरजस्ती बोल्न लगाउँदा त्यसले अपेक्षित प्रभाव पार्न नसक्ने तर्क गर्नुभयो ।
ठूलो पदमा भएकै आधारमा मात्र बोल्न दिने परिपाटीले कतिपय अवस्थामा विषयवस्तु ओझेलमा पर्नसक्ने उहाँको विश्लेषण छ । सूचना र प्रविधिको वर्तमान युगमा प्रश्तुति शैलीले नै मुख्य अर्थ राख्ने बताउँदै उहाँले ज्ञान र दक्षतालाई आधार बनाएर अघि बढ्नुपर्ने उल्लेख गर्नुभयो ।
नागरिकको जीवनस्तर र उनीहरूको बढ्दो आकांक्षाको अनुपातमा मुलुकको आर्थिक वृद्धि हुन नसक्दा पार्टी र जनताबीच केही दूरी कायम भएको उहाँको भनाइ छ ।
