कांग्रेस ललितपुर जिल्ला कार्यसमितिले आज ललितपुरको नखिपोटमा आयोजना गरेको सन्तनेता कृष्णप्रसाद भट्टराईको सालिक अनावरण कार्यक्रममा बोल्दै सभापति थापाले स्वतन्त्रता, लोकतन्त्र र जनअधिकारका लागि भट्टराईले पुर्याउनुभएको योगदानको सम्मानस्वरूप नेपाली जनताले उहाँलाई ‘सन्तनेता’को उपाधि दिएको उल्लेख गर्नुभयो।
उहाँले भट्टराईको त्याग, इमानदारी र लोकतान्त्रिक मूल्यप्रतिको प्रतिबद्धता नयाँ पुस्ताका लागि प्रेरणाको स्रोत रहेको बताउँदै उहाँका आदर्शलाई व्यवहारमा उतार्न आवश्यक रहेको धारणा व्यक्त गर्नुभयो।
सभापति थापाले नेपाली कांग्रेसले पार्टीको अधिवेशनमा ३० वर्षभन्दा कम उमेरका युवाको प्रतिनिधित्व सुनिश्चित गर्न नीतिगत व्यवस्था गरेको जानकारी दिँदै पार्टीलाई थप समावेशी र पुस्तान्तरणमैत्री बनाउने दिशामा कांग्रेस अघि बढिरहेको बताउनुभयो।
फरक प्रसंगमा उहाँले प्रदेश सरकार गठनका विषयमा टिप्पणी गर्दै प्रदेशमा तीनवटा ठूला राजनीतिक दल मिलेर सरकार गठन गर्नु उपयुक्त नहुने धारणा व्यक्त गर्नुभयो।
