काठमाडौं । दुग्ध विकास संस्थान (डीडीसी) ले आगामी आर्थिक वर्ष २०८३/८४ देखि दूध संकलन प्रणालीलाई थप व्यवस्थित, प्रविधिमैत्री, दिगो र अनुमानयोग्य बनाउने उद्देश्यसहित दूध उत्पादक सहकारी संस्था तथा निजी डेरी फार्मलाई साउन मसान्तभित्र सम्पर्क गर्न आग्रह गरेको छ।
संस्थानले आइतबार जारी गरेको सूचनामा विगत ५७ वर्षदेखि दुग्ध उत्पादक सहकारी संस्था, निजी फार्म तथा किसानबाट उत्पादित दूध संकलन गर्दै आएको उल्लेख गर्दै सबै सरोकारवालाप्रति आभार व्यक्त गरेको छ।
संस्थानले आगामी दिनमा सहकारी तथा निजी फार्मसँगको सहकार्यलाई अझ सुदृढ बनाउँदै दुग्ध क्षेत्रको विकासमा निरन्तर योगदान गर्ने विश्वास व्यक्त गरेको छ।
सूचनाअनुसार, आर्थिक वर्ष २०८३/८४ देखि लागू हुने नयाँ व्यवस्थाअनुसार संस्थानसँग निरन्तर दूध कारोबार गर्न इच्छुक सहकारी संस्था तथा निजी फार्मले २०८३ साल साउन मसान्तभित्र आफूलाई पायक पर्ने डीडीसीको आयोजना, चिस्यान केन्द्र वा केन्द्रीय कार्यालयमा सम्पर्क गर्नुपर्नेछ।
संस्थानले तोकिएको अवधिभित्र सम्पर्कमा नआउने सहकारी संस्था तथा निजी फार्मसँग त्यसपछि दूध खरिद–बिक्रीको कारोबार गर्न आफू बाध्य नहुने स्पष्ट गरेको छ।
