भोजपुर । भोजपुर आम्तेकका ३२ वर्षीय चन्द्र खड्का असोज ३ गते काठमाडौं पुगे। उनलाई वैदेशिक रोजगारको सिलसिलामा कतार जान भिषा प्रक्रिया मिलाउनु थियो। तर काठमाडौं पुग्नासाथ घरबाट बाबुको देहान्तको खबर पाएपछि तीन दिन लगाएर घर फर्किए। घर पुग्दा जेठा दाजु सम्मरबहादुर खड्काको अगुवाइमा बाबुको अन्तेष्टिपछि काजकिरिया सुरु भएको थियो। दाजुकोमा कर्म सुरु भएपछि किरिया बस्न पुगेका चन्दलाई दलितसँग विवाह गरेको भन्दै किरिया बस्न नदिएपछि उनी उक्ले १३ दिने किरियाकर्ममा लागे।

दलितकी छोरी बिहे गरेकै कारण आफ्नै दाजु र समाजबाट बहिस्कृत भएर बाबुको मृत्यु संस्कार पूरा गर्न बसेका छन्। ‘यो कस्तो समाज, अनि कस्तो धर्मसंस्कार रु मैले मेरो जन्मदिने बाबुको किरियापुत्री बस्न पनि पाइँन, मेरो के दोष हो? ’ उनले गुनासो पोखे, ‘दलित बिहे गरेँ भन्दैमा मलाई घर र समाजले बहिस्कार गर्ने मेरी पत्नी पनि त मान्छे हुन्। ’ पीडीत चन्द्रका दाजु सम्मरबहादुर, किरियापुत्रीको काम गराउने पण्डित र केहि व्यक्तिले उनलाई बहिस्कार गरेको चन्द्रको भनाइछ।

०६२ सालमा छिमेकी लालबहादुर विश्वकर्माकी छोरी गीता विश्वकर्मासँग प्रेमविवाह गरेका चन्द्र र उनका दाजु सम्मरबीच सम्बन्ध राम्रो नभएपछि छुट्टै बस्दै आएका थिए। विवाहको केहि समयपछि दाजुसँग चन्द्रको सम्बन्ध चिसिएको थियो। घरमा आउजाउ मात्रै नभई बोलचाल नै बन्द थियो। दाजुको घरमा दाजुसँगै बाबुको किरिया बसेका बेला ब्राम्हण लेखनाथ खनालले दाजु सम्मरबहादुरलाई ‘भाइसँगै बसेर जुठो बार्छौ भने म आएर काम गर्दिन, तिम्रो भाइलाई छुदिनँ’ भनेर आफूलाई सामाजिक बहिष्कार गरेको उनको आरोप छ।

त्यसपछि दाजुले पनि ‘तँ आफ्नो घरमा गएर जुठो बार्, म मेरो घरमा बार्छु, यहाँ नआइज’ भनेर तिरष्कार गरेको उनले बताए। घटनापछि गीताका माइतीले पनि न्यायको माग गरेका छन्। आफ्नी छोरी र ज्वाँइप्रति जातिय भेदभाव गर्नेलाई कानुनी कारबाही हुनुपर्ने गिताका यस्तो व्यवहार देखाउनेलाई कारबाही हुनुपर्ने गीताका बावु लालबहादुर विश्वकर्माले बताए। बाबुको किरीयाबाट बहिष्कृत भएपछि शुक्रबार पीडीत चन्द्रले जिल्ला प्रहरी कार्यालय भोजपुरमा जाहेरी दिएका छन्।

प्रहरीले पनि इलाका प्रहरी तिवारीभञ्ज्याङको टोली खटाई दाजु सम्मरबहादुर, पण्डित लेखनाथ र छिमेकी दाजुभाइसँग पीडीत पक्ष राखेर मिलापत्र गर्ने कोसिस गरेको थियो। तर त्यहाँ कुनै निस्कर्ष निस्केन। सहमति नभएपछि पीडीतको जाहेरी अनुरुप कानुनी प्रक्रिया अघि बढाउने तयारी गरेको डीएसपी नरबहादुर मगरले बताए। अन्नपुर्णपोष्ट दैनिकबाट