काठमाडौँ। लुम्बिनी बौद्ध विश्वविद्यालयले आगामी आर्थिक वर्ष २०८३÷८४ का लागि रु ४९ करोड ८८ लाख बराबरको बजेट, नीति तथा कार्यक्रम स्वीकृत गरेको छ ।
शिक्षा, विज्ञान तथा प्रविधिमन्त्री एवं विश्वविद्यालयका सहकुलपति सम्मित पोखरेलको अध्यक्षतामा आज सिंहदरबारमा बसेको बैठकले विश्वविद्यालयले आफ्नो मूल उद्देश्यअनुसार बौद्ध शिक्षा, बौद्ध दर्शन र बौद्ध अध्ययनमा केन्द्रित भएर शैक्षिक कार्यक्रम सञ्चालन गर्नुपर्नेमा जोड दिनुभयो । उहाँले विश्वविद्यालयलाई राष्ट्रिय तथा अन्तरराष्ट्रियस्तरमा बौद्ध अध्ययनको उत्कृष्ट केन्द्रका रूपमा विकास गर्न आवश्यक रणनीति अवलम्बन गर्न निर्देशन दिनुभयो ।
बैठकमा उपकुलपति डा माणिकरत्न शाक्यले विश्वविद्यालयमा हाल दुई हजार ६२० विद्यार्थी अध्ययनरत रहेको र विश्वविद्यालयअन्तर्गत ५४ वटा शैक्षिक कार्यक्रम सञ्चालनमा रहेको बताउनुभयो । विश्वविद्यालयका आठ सम्बन्धन प्राप्त कलेज र आठ सहकार्यमा सञ्चालित कलेज छन् । विश्वविद्यालयमा २०२ अन्तरराष्ट्रिय विद्यार्थी अध्ययनरत छन् ।
चीन, जापान, भारत, कोरियालगायतका विश्वविद्यालय तथा संस्थासँग थप समझदारीपत्र सम्पन्न गरी अन्तरराष्ट्रिय सहकार्य विस्तार गरेको, पाठ्यक्रममा माइक्रो–सिलेबस प्रणाली लागू गरेको तथा कम्प्युटर आधारित परीक्षा र प्रोक्टरिङ प्रणाली विस्तार गरी परीक्षा व्यवस्थापनलाई थप व्यवस्थित बनाएको विश्वविद्यालयका सहायक निर्देशक चुरामणि पोखरेलले जानकारी दिनुभयो ।
विश्वविद्यालयले आर्थिक तथा प्रशासनिक सुधारका विभिन्न कार्यक्रम अघि बढाएको, आन्तरिक आय वृद्धि र वित्तीय अनुशासनमा प्रगति हासिल गरेको जानकारी बैठकमा प्रस्तुत गरिएको थियो ।
बैठकमा विश्वविद्यालय सभाका सदस्य, पदाधिकारी तथा सम्बन्धित निकायका प्रतिनिधिहरूको सहभागिता रहेको थियो । रासस
