प्योङयाङ। अमेरिकासँग परमाणु वार्ता पुनः सुरु गर्ने घोषणा गरेको केही घण्टापछि नै उत्तर कोरियाले पन्डुब्बीबाट एउटा ब्यालिस्टिक क्षेप्यास्त्र प्रहार गरेको छ । दक्षिण कोरियाली अधिकारीका अनुसार वन्सान पोर्ट नजिकैबाट प्रहार गरिएको सो क्षेप्यास्त्र आकाशमा ९ सय १० किलोमिटरमाथि पुगेको र जापान सागरमा खस्नुअघि त्यसले ४५० किलोमिटर दूरी पार गरेको थियो ।
उत्तर कोरियाले गत मे महिनादेखि छोटो दूरीका क्षेप्यास्त्र परीक्षण गर्न सुरु गरेको हो । क्षेप्यास्त्र परीक्षणको विभिन्न पक्षले विरोध गरेका छन् । टोकियोले सो क्षेप्यास्त्रको अंश जापानको विशेष आर्थिक क्षेत्रमा रहेको सामुद्रिक क्षेत्रमा आइपुगेको उल्लेख गरेको छ । दक्षिण कोरियाको सुरक्षा परिषद्ले प्योङयाङले पन्डुब्बीको प्रयोग गरी क्षेप्यास्त्र परीक्षण गरेको हुन सक्ने जनाएको छ । सो परीक्षणको केही घण्टाअघि मात्रै प्योङयाङले अमेरिकासँगको परमाणु वार्ता पुनः थाल्ने बताएको थियो । उत्तर कोरियाले कूटनीतिक प्रयाससँगै आफ्ना विरोधीविरुद्ध दबाब बढाउन निरन्तर रूपमा क्षेप्यास्त्र परीक्षण गर्ने गरेको छ ।
उत्तर कोरियाले गरेको पछिल्लो परीक्षण छोटो दूरीका क्षेप्यास्त्र परीक्षणमा सबैभन्दा उल्लेख्य परीक्षण हुनेछ । जापानी प्रधानमन्त्री सिन्जो आबेले प्योङयाङको कदमले उत्तर कोरियाली ब्यालिस्टिक क्षेप्यास्त्र प्रविधिमाथि प्रतिबन्ध लगाउने राष्ट्रसंघ सुरक्षा परिषद्का निर्णय उल्लंघन भएको बताएका छन् । त्यसअघि प्योङयाङले वासिंगटनसँग परमाणु निरस्त्रीकरणसम्बन्धी वार्ता यसै साताको अन्त्यमा सुरु हुन सक्ने बताएको थियो ।
हनोईमा अमेरिकी राष्ट्रपति डोनल्ड ट्रम्प र उत्तर कोरियाली नेता किम जोङ–उनबीच फेब्रुअरीमा भएको वार्ता बिनानिष्कर्ष टुंगिएपछि दुई पक्षबीचको संवाद अवरुद्ध छ । विज्ञहरूले वार्ताको घोषणा भएपछि क्षेप्यास्त्र परीक्षण नियोजित रूपमा गरिएको हुन सक्ने टिप्पणी गरेका छन् । क्षेप्यास्त्र परीक्षणसम्बन्धी पहिलो समाचार बुधवार बिहानै आएको थियो । पहिलो समाचारमा दुईवटा क्षेप्यास्त्र प्रक्षेपण गरिएको र कम्तीमा एउटा क्षेप्यास्त्र जापानी जलक्षेत्रमा खसेको अधिकारीले बताएका थिए ।
त्यसलगत्तै जापानको मन्त्रिपरिषद्का प्रमुख सचिवले पत्रकार सम्मेलनमा पानीमा खस्नुअघि एउटा ब्यालिस्टिक क्षेप्यास्त्र दुई टुक्रा भएको हुन सक्ने बताए । जापानले सो विषयमा छलफल गर्न सुरक्षा परिषद्को बैठक बोलाएको छ । यो उत्तर कोरियाले यस वर्ष गरेको ११औं क्षेप्यास्त्र परीक्षण हो । अधिकारीहरूले यसको सामथ्र्य र मार हान्ने क्षमताबारे विशेष चासो देखाएका छन् । उत्तर कोरियाले केही समय यता पन्डुब्बीबाट प्रहार गर्न सकिने ब्यालिस्टिक क्षेप्यास्त्र प्रविधिको विकास गर्ने प्रयास जारी राखेको छ । उसले लामो दूरीका क्षेप्यास्त्रको परीक्षण रोकेको थियो ।
पन्डुब्बीबाट प्रहार गरिने ब्यालिस्टिक क्षेप्यास्त्रको परीक्षण यसअघि राष्ट्रपति ट्रम्पले पदभार ग्रहण गर्नुभन्दा पहिले नै अगस्ट २०१६ मा गरेको थियो । यसको दुई वर्षपछि ट्रम्प र किम जोङ–उनले एउटा ऐतिहासिक भेटवार्ता गरेका थिए । उत्तर कोरिया र अमेरिकाका शीर्षस्थ नेताबीच भएको यो नै पहिलो वार्ता थियो । त्यसपछि दुईवटा थप भेटवार्ता भए पनि उत्तर कोरियाको परमाणु कार्यक्रमबारे सहमति जुट्न सकेको छैन । राजधानी दैनिकबाट
