काठमाडौँ। भारतको पश्चिमी राज्य महाराष्ट्रमा भारी वर्षाका कारण फोहोरको विशाल थुप्रो एउटा तीनतले भवनमाथि खस्दा १६ जना भग्नावशेषमा पुरिएको आशंका गरिएको छ ।
स्थानीय अधिकारीहरूका अनुसार बुधवार भएको उक्त दुर्घटनाका बेला भवनभित्र कुल २० जना रहेका थिए । तीमध्ये चार जना भागेर ज्यान जोगाउन सफल भए पनि बाँकी १६ जना कर्मचारीहरू भित्रै फसिरहेको बताइएको छ ।
घटना लगतै प्रहरी, दमकल विभाग र विपद् व्यवस्थापनको टोली उद्धारका लागि घटनास्थल पुगेका छन् । लगातारको वर्षाका कारण फोहोरको थुप्रो खुकुलो भई भवनमाथि खसेको प्रारम्भिक अनुमान गरिएको छ ।
भारतमा मनसुन शुरु भएसँगै विगत केही दिनदेखि महाराष्ट्रका पुणे र मुम्बई लगायतका क्षेत्रमा भइरहेको भारी वर्षाले जनजीवन अस्तव्यस्त बनाएको छ । सिन्ह्वा/न्युज एजेन्सी नेपाल
