नवलपरासी। नवलपरासी (बर्दघाट सुस्तापूर्व)लाई पूर्णखोप सुनिश्चितता तथा दिगोपना जिल्ला घोषणा गरिएको छ ।
स्थानीय तह, स्वास्थ्य संस्था, महिला स्वास्थ्य स्वयंसेविका र समुदायको सक्रिय सहभागिताबाट जिल्लाभित्र खोप लगाउनुपर्ने उमेर समूहका सबै बालबालिकाको पहुँच सुनिश्चित भएपछि आज औपचारिक रूपमा जिल्लालाई पूर्णखोप सुनिश्चितता तथा दिगोपना घोषणा गरिएको हो।
जिल्लाका सबै स्थानीय तहले निर्धारित मापदण्ड पूरा गरी पूर्णखोप सुनिश्चितता घोषणा गरिसकेपछि जिल्ला तहमा पनि घोषणा गरिएको प्रदेश जनस्वास्थ्य कार्यालय नवलपरासी (बर्दघाट सुस्तापूर्व) का प्रमुख केशव चापागाईंले बताउनुभयो ।
जिल्लामा गैँडाकोट, देवचुली, कावासोती र मध्यविन्दु नगरपालिका तथा हुप्सेकोट, विनयी त्रिवेणी, बुलिङटार र बौदीकाली गाउँपालिकासहित आठ स्थानीय तह रहेका छन् । जिल्लाभर १४९ खोप केन्द्रमार्फत नियमित खोप सेवा सञ्चालन हुँदै आएको प्रमुख चापागाईंले बताउनुभयो ।
राष्ट्रिय जनगणना २०७८ अनुसार जिल्लाको कुल जनसङ्ख्या तीन लाख ७७ हजार ७०७ रहेको छ । चालु आवमा एक वर्षमुनिका चार हजार ८५४ बालबालिका, एकदेखि दुई वर्ष उमेर समूहका पाँच हजार २३२ बालबालिका तथा पाँच हजार ८३१ गर्भवतीलाई नियमित खोप तथा सम्बन्धित सेवा प्रदान गर्ने लक्ष्य राखिएको थियो ।
जिल्ला खोप समन्वय समितिका अनुसार पूर्णखोप सुनिश्चितताका लागि स्थानीय तहमा घरधुरी सर्वेक्षण, छुट बालबालिकाको पहिचान, अभिलेख प्रमाणीकरण, नियमित खोप सेवा तथा अनुगमनका सबै प्रक्रिया पूरा गरिएको थियो । सबै स्थानीय तहले पूर्णखोप सुनिश्चिततापछि जिल्ला तहमा घोषणा गरिएको हो ।
जिल्लामा बौदीकाली गाउँपालिकाले जेठ ११ गते, बुलिङटार र मध्यविन्दुले जेठ १३ गते, विनयी त्रिवेणीले जेठ १९ गते, हुप्सेकोट र देवचुलीले जेठ २१ गते, गैँडाकोटले जेठ ३० गते तथा कावासोती नगरपालिकाले असार १२ गते पूर्णखोप सुनिश्चितता तथा दिगोपना घोषणा गरेका थिए ।
गण्डकी प्रदेशका स्वास्थ्यमन्त्री लक्ष्मणबहादुर पाण्डेले पूर्णखोप सुनिश्चितता घोषणा एउटा औपचारिक कार्यक्रम नभई भावी पुस्ताको स्वास्थ्य सुरक्षाप्रतिको सामूहिक प्रतिबद्धता भएको बताउनुभयो ।
स्वास्थ्यमन्त्री पाण्डेले नियमित खोप कार्यक्रमलाई अझ प्रभावकारी बनाउन प्रदेश सरकारले आवश्यक स्रोत, साधन र प्राविधिक सहयोगलाई निरन्तरता दिने प्रतिबद्धता पनि व्यक्त गर्नुभयो ।
प्रदेश जनस्वास्थ्य कार्यालय नवलपरासी (बर्दघाट सुस्तापूर्व) का प्रमुख केशव चापागाईंले पूर्णखोप सुनिश्चितता घोषणा एकदिने उपलब्धि नभई वर्षभर सञ्चालन गरिएको घरधुरी सर्वेक्षण, छुट बालबालिकाको खोजी, तथ्याङ्क प्रमाणीकरण तथा नियमित अनुगमनको परिणाम भएकोे बताउनुभयो ।
कार्यक्रममा पूर्णखोप अभियानलाई सफल बनाउन योगदान पु¥याउने स्वास्थ्यकर्मी, महिला स्वास्थ्य स्वयंसेविका, स्थानीय तहका जनप्रतिनिधि, सरकारी कार्यालय तथा सरोकारवाला निकायलाई सम्मान तथा धन्यवाद ज्ञापन गरियो ।
पूर्णखोप सुनिश्चितता कार्यक्रम नेपाल सरकारले सञ्चालन गर्दै आएको राष्ट्रिय खोप कार्यक्रमअन्तर्गतको अभियान हो ।
यसले जन्मेदेखि १५ महिनासम्मका बालबालिकालाई तोकिएको सबै नियमित खोप समयमै प्राप्त भएको सुनिश्चित गर्दै दादुरा, रुबेला, पोलियो, क्षयरोग, डिप्थेरिया, लहरेखोकी, धनुष्टङ्कारलगायत रोगबाट बालबालिकाको सुरक्षा गर्ने लक्ष्य राखेको छ । रासस
