काठमाडौं । नेकपा (एमाले)का महासचिव शंकर पोखरेलले सरकारले ठूला लगानीकर्तालाई करोडौं रुपैयाँ अनुदान दिनेभन्दा आम किसानलाई समयमै मल, गुणस्तरीय बीउ र उत्पादनको उचित मूल्य सुनिश्चित गर्नुपर्ने बताएका छन्।
राष्ट्रिय धान दिवस तथा रोपाइँ दिवस (असार १५) का अवसरमा शुभकामना सन्देश जारी गर्दै महासचिव पोखरेलले यस वर्ष अनियमित वर्षा र खडेरीको सम्भावना रहेकाले किसानलाई हुन सक्ने क्षतिबाट जोगाउन सरकारले कृषि बिमाको पूर्ण सुनिश्चितता गर्नुपर्नेमा जोड दिएका छन्।
उनले सरकारले कृषिमा २ करोड रुपैयाँभन्दा बढी लगानी गर्ने किसानका लागि आकर्षक अनुदान घोषणा गरेको उल्लेख गर्दै व्यावसायिक कृषि र आधुनिकीकरणका लागि यस्तो कदम सकारात्मक भए पनि यसबाट अधिकांश साना किसान लाभान्वित हुन नसक्ने बताएका छन्।
“सरकारले कृषिमा २ करोड रुपैयाँभन्दा बढी लगानी गर्नेहरूका लागि आकर्षक अनुदानको घोषणा गरेको छ। व्यावसायिकता र आधुनिकीकरणका लागि यो कदम आफैंमा नराम्रो होइन। तर प्रश्न उठ्छ, के आम नेपाली किसानको हैसियत त्यति ठूलो लगानी गर्न सक्ने बनेको छ र?” उनले सन्देशमा उल्लेख गरेका छन्।
पोखरेलले कृषि र किसानको भूमिकाको प्रशंसा गर्दै भौतिक रूपमा संसारले जतिसुकै समृद्धि हासिल गरे पनि मानव जीवनका लागि खाद्यान्नको महत्व कहिल्यै कम नहुने बताएका छन्। उनले सरकारले यो यथार्थलाई स्वीकार गर्नुको सट्टा अर्थतन्त्रको मेरुदण्ड मानिने कृषि क्षेत्र र साना तथा मझौला किसानलाई अझै पनि प्राथमिकतामा राख्न नसकेको टिप्पणी गरेका छन्।
सरकारले नीति तथा कार्यक्रममार्फत मध्यम वर्गको संरक्षणको कुरा गरिरहेको उल्लेख गर्दै पोखरेलले संघर्ष गरेर उत्पादनमा निरन्तर लागिरहेका किसानलाई राज्यको बढी संरक्षण र साथ आवश्यक रहेको बताएका छन्। उनका अनुसार कृषिको वास्तविक विकासका लागि किसानमैत्री नीति र व्यवहारिक सहयोग अपरिहार्य छ।
