नयाँदिल्ली। भारतले संयुक्त राज्य अमेरिकासँग जारी व्यापार वार्तामा भएको प्रगतिलाई सकारात्मक रूपमा लिँदै यसलाई सम्भावित व्यापार सम्झौतातर्फको महत्वपूर्ण कदम भएको जनाएको छ ।
यद्यपि दुवै पक्षबीच केही विषयमा अझै सहमति हुन बाँकी रहेकाले अन्तिम सम्झौता भने सम्पन्न भइसकेको छैन ।
भारतीय वाणिज्य तथा उद्योगमन्त्री पियुष गोयलले भारत भ्रमणमा रहेका अमेरिकी व्यापार प्रतिनिधि जेमिसन ग्रीरसँग दुई दिनसम्म भएको वार्ता रचनात्मक तथा परिणाममुखी रहेको बताउनुभएको छ ।
भारत र अमेरिकाले गत फेब्रुअरीमा प्रारम्भिक समझदारी घोषणा गरेका थिए । त्यसअनुसार अमेरिकाले भारतीय वस्तुमाथिको केही भन्सार दर २५ प्रतिशतबाट १८ प्रतिशतमा झार्ने तथा भारतले विभिन्न औद्योगिक र कृषि उत्पादनमा भन्सार शुल्क घटाउने अपेक्षा गरिएको छ ।
अमेरिकी सर्वोच्च अदालतले राष्ट्रपति डोनाल्ड ट्रम्पको व्यापक भन्सार नीतिलाई खारेज गरेपछि वार्ताको गति प्रभावित भएको थियो । त्यसपछि वाशिङ्टनले भारतसहित विभिन्न मुलुकविरुद्ध कथित अनुचित व्यापार अभ्यासबारे अनुसन्धान सुरु गरेपछि वार्ता थप जटिल बनेको बताइएको छ ।
भारतीय वाणिज्य मन्त्रालयले जारी गरेको विज्ञप्तिअनुसार गोयल र ग्रीरबीच विभिन्न चरणमा विस्तृत छलफल भएको थियो । मन्त्रालयले उक्त भ्रमणलाई जारी व्यापार वार्ताको महत्वपूर्ण उपलब्धिका रूपमा वर्णन गरेको छ ।
दुवै पक्षले अन्तरिम व्यापार सम्झौता छिट्टै अन्तिम रूप दिन सकिने विश्वास व्यक्त गरेका छन् । मन्त्री गोयलले सम्झौताको प्रारम्भिक चरणको करिब ९९ प्रतिशत काम सम्पन्न भइसकेको बताउनुभयो ।
भारतका लागि अमेरिकी राजदूत सर्जियो गोरले पनि वार्ताकार बाँकी रहेको ‘अन्तिम एक प्रतिशत’ विषयमा सहमति खोज्न केन्द्रित रहेको बताउनुभयो ।
मन्त्री गोयलका अनुसार भारतले अन्य प्रतिस्पर्धी मुलुकको तुलनामा आफ्ना उत्पादनका लागि प्रतिस्पर्धी भन्सार दर सुनिश्चित गर्नुपर्ने विषयलाई प्राथमिकतामा राखेको छ ।
भारतीय वाणिज्य मन्त्रालयका एक अधिकारीका अनुसार नयाँदिल्लीले निश्चित अवधि पश्चात् दुवै पक्षलाई सम्झौताका प्रावधान पुनरावलोकन गर्न सकिने व्यवस्था समेट्ने प्रस्ताव पनि अघि सारेको छ । रासस
