काठमाडाैँ । चितवनको भरतपुरमा राष्ट्रिय स्वतन्त्र पार्टी (रास्वपा)को पहिलो महाधिवेशन आजदेखि बन्दसत्रमा प्रवेश गरेको छ। गेस्टहाउस चौरमा आइतबार उद्घाटन भएको महाधिवेशन अब चितवन उद्योग संघको प्रदर्शनी केन्द्रमा औपचारिक छलफल र निर्णय प्रक्रियामा केन्द्रित हुँदैछ। देश–विदेशबाट आएका करिब चार हजार एक सय प्रतिनिधि महाधिवेशनमा सहभागी छन्।
उद्घाटन दिन प्रतिनिधिहरूले आफैं होटल तथा खानपिनको व्यवस्था मिलाएका थिए। तर आजदेखि भने पार्टीले सम्पूर्ण भोजन व्यवस्थापनको जिम्मा लिएको छ। बिहानैदेखि महाधिवेशन स्थलमै ब्रेकफास्ट सुरु गरिएको छ भने प्रतिनिधिहरूका लागि बिहान, दिउँसो र बेलुकाको खानाको व्यवस्था गरिएको छ।
आयोजकका अनुसार बिहानको भोजनमा खसीको मासु र भात समावेश गरिएको छ भने बेलुकीका लागि मिक्स भेज तरकारीको व्यवस्था गरिएको छ। प्रतिनिधिहरूलाई दिनभरको बसाइ सहज बनाउन खानपिनको व्यवस्थापन व्यवस्थित रूपमा अघि बढाइएको पार्टी स्रोतले जनाएको छ।
महाधिवेशनको खानपिन व्यवस्थापनको जिम्मा दियालो फुडल्यान्डले तीन दिनका लागि लिएको छ।
तस्बिरः प्रदीप राज वन्त, रासस
