काठमाडौँ। कृषि, वन तथा पर्यावरणमन्त्री गीता चौधरीले मोटरसाइकल पर्यटनले कृषि, पर्यटन र स्थानीय अर्थतन्त्रको प्रवर्द्धनमा महत्त्वपूर्ण योगदान पुर्याउने बताउनुभएको छ ।
‘द हिमालयन मोटरसाइकल एक्सपेरियन्स (टिएचएमई)’द्वारा आज यहाँ आयोजित ‘नवौँ म्याङ्गो राइड–२०२६’को उद्घाटन गर्दै मन्त्री चौधरीले साहसिक पर्यटनमार्फत तराई क्षेत्रको पर्यटन सम्भावना उजागर गर्न, आन्तरिक पर्यटन प्रवर्द्धन गर्न तथा स्थानीय अर्थतन्त्र सुदृढ बनाउन यस्ता कार्यक्रम फलदायी हुने विश्वास व्यक्त गर्नुभयो ।
मन्त्री चौधरीले नेपालको प्राकृतिक, सांस्कृतिक तथा कृषि सम्पदाको संरक्षण, प्रवर्द्धन र प्रभावकारी प्रचारप्रसारमा युवाको सक्रिय सहभागिता अपरिहार्य रहेको बताउनुभयो । उहाँले मुलुकको आर्थिक रूपान्तरणमा युवा पुस्ताको सिर्जनशीलता, नवप्रवर्तन र सक्रियताको महत्त्वपूर्ण भूमिका रहने उल्लेख गर्नुभयो ।
“कृषि तथा पर्यटन क्षेत्रको दिगो विकासका लागि युवाको ऊर्जा र सहभागितालाई सही दिशामा परिचालन गर्न आवश्यक रहेको छ । यस्ता अभियानले स्थानीय उत्पादनको बजारीकरण तथा ग्रामीण अर्थतन्त्रको सबलीकरणमा समेत योगदान पुर्याउँछ”, मन्त्री चौधरीले भन्नुभयो, “म्याङ्गो राइड मोटरसाइकल यात्रामा सीमित नरही सामाजिक उत्तरदायित्व र समुदायसँगको सहकार्यमा आधारित अभियानका रूपमा विकसित भएको छ ।”
नयाँ पर्यटन गन्तव्यको पहिचान, सामाजिक सञ्जालमार्फत नेपालको प्रचारप्रसार तथा स्थानीय समुदायसँगको प्रत्यक्ष अन्तक्र्रिया कार्यक्रमको सकारात्मक पक्ष भएको उहाँले बताउनुभयो ।
सन् २०१५ देखि निरन्तर सञ्चालन हुँदै आएको उक्त कार्यक्रमले साहसिक पर्यटनसँगै परोपकारी र सामाजिक गतिविधिलाई समेत अघि बढाउँदै आएको आयोजकले जनाएको छ ।
मन्त्री चौधरीले यस्ता कार्यक्रमले अन्तरराष्ट्रियस्तरमा नेपालको पहिचान अभिवृद्धि गर्न तथा पर्यटन क्षेत्रको प्रवर्द्धनमार्फत आर्थिक गतिविधि विस्तार गर्न सहयोग पुग्ने विश्वास व्यक्त गर्दै कार्यक्रमको सफलताको कामना गर्नुभयो । रासस
