काठमाडौँ । नेकपा (एमाले) लाई नयाँ स्तरमा सुदृढ र व्यवस्थित गर्ने उद्देश्यसहित सुरु गरिएको ‘आत्म समीक्षा र पुनर्गठन’ अभियानप्रति पार्टी नेता ईश्वर पोखरेलले सफलताको कामना व्यक्त गरेका छन्।
सामाजिक सञ्जालमार्फत उनले यो अभियानप्रति पूर्ण सफलताको शुभकामना व्यक्त गर्दै जुनसुकै बाधा–व्यवधान आए पनि तथा विभिन्न आरोप–लाञ्छना भए पनि पार्टी पंक्ति र आम जनअपेक्षा अनुसार अभियान सफलतापूर्वक अघि बढ्ने विश्वास व्यक्त गरेका छन्।
उनले उक्त अभियानलाई पार्टी संगठनलाई अझ सुदृढ, व्यवस्थित र प्रभावकारी बनाउने महत्वपूर्ण प्रयासका रूपमा लिएको उल्लेख गरेका छन्।
यसैबीच, पारिवारिक कारणले आफू केही समय विशेष व्यस्त हुनुपरेको पनि उनले जनाएका छन्। आफ्नी जीवनसंगिनी मिराजीको स्वास्थ्यमा गम्भीर समस्या देखिएको र उपचारको सिलसिलामा व्यस्त रहनुपर्ने भएकाले अभियानमा प्रत्यक्ष रूपमा सहभागी हुन असमर्थ रहेको उनले स्पष्ट पारेका छन्।
पोखरेलले अभियानमा संलग्न सबै नेता तथा कार्यकर्तालाई निरन्तर सक्रियताका साथ अघि बढ्न समेत आग्रह गरेका छन्।
