काठमाडाैँ । नेकपा (एमाले) संसदीय दलका नेता रामबहादुर थापाले पार्टीका कमजोरीहरूलाई सुधार्दै नयाँ विचार र नीतिका आधारमा पार्टी पुनर्गठन गर्नुपर्ने बताउनुभएको छ ।
शुक्रवार नेकपा (एमाले) बागमती प्रदेश कमिटीद्वारा आयोजित एक कार्यक्रमलाई सम्बोधन गर्दै उहाँले उक्त कुरा बताउनुभएको हो । नेता थापाले वर्तमान राजनीतिक परिस्थितिमा विपक्षीहरूले प्राप्त गरेको सफलतालाई ‘अस्थायी’ संज्ञा दिँदै एमालेको विजय सुनिश्चित गर्न संगठनलाई नयाँ आधारमा उभ्याउनुपर्नेमा जोड दिनुभयो ।
आफूहरुको कमजोरीका कारण विपक्षीहरुल अस्थायी सफलता प्राप्त गरेको बताउनु भयो । अब यसलाई चिर्न नयाँ नीति र विचारका साथ अघि बढ्नु अपरिहार्य भएको जिकिर गर्नुभयो ।
उहाँले भन्नुभयो, ‘अहिले अस्थायी रूपमा उनीहरू सफल भएपनि हाम्रा कमजोरीहरूलाई टेकेर उनीहरू सफल भएका हुन् । तर यो सफलता अस्थायी हो । त्यसकारण यो सफलतालाई अस्थायी बनाउनका निम्ति हामीले पार्टीलाई नयाँ आधारमा, नयाँ विचार र नयाँ नीतिको आधारमा पुनर्गठन गर्नुपर्छ र अगाडि बढ्नुपर्छ । यसरी मात्रै हामीले फेरि विजय प्राप्त गर्नसक्छौँ । अहिले नेपालमा तपाईंले यो प्रतिक्रान्ति र प्रतिगमनपछिको जुन स्थिति देखिरहनुभएको छ, यो हामीले पहिल्यै पनि भनेका थियौँ । हामीले भदौ २४ को परिघटनाको समीक्षा गर्दा के भनेका थियौँ भने, यो एउटा प्रतिगमन हो, यो क्रान्ति होइन । यो एउटा असंवैधानिक कदम हो, त्यसकारण यो कुनै संवैधानिक कदम होइन ।’
नेता थापाले फागुन २१ पछि रास्वपासहित बनेको वर्तमान सरकार स्वेच्छाचारिता र अधिनायकवादतर्फ उन्मुख भएको आरोप लगाउनु भयो । सरकारले नागरिकको संगठित हुन पाउने मौलिक अधिकार कुण्ठित गर्न खोजेको र सुकुम्बासीहरूमाथि दमन गरेको उहाँले उल्लेख गर्नुभयो । वर्तमान सरकारको गतिविधिले गणतन्त्र र लोकतान्त्रिक संस्थाहरूको मर्यादामाथि प्रहार भएको बताउनु भयो । सीमा विवाद र राष्ट्रियताका सवालमा प्रधानमन्त्रीको हालैको अभिव्यक्तिलाई थापाले राष्ट्रिय आत्मसमर्पणवाद को संज्ञा दिनुभयो । यसैगरी, राष्ट्रिय स्वतन्त्र पार्टी (रास्वपा) का सभापतिको हालैको भारत भ्रमण र त्यहाँ उहाँलाई दिइएको उच्चस्तरीय स्वागतप्रति पनि थापाले संशय व्यक्त गर्नुभयो ।
भारतको सत्तारुढ दलले एक पार्टी अध्यक्षलाई प्रधानमन्त्री वा राष्ट्रपति सरहको सम्मान दिनुको राजनीतिक अर्थ गम्भीर हुने उहाँको तर्क थियो । वाह्य शक्तिहरू नेपालको वर्तमान नेतृत्वसँग सन्तुष्ट नरहेको र नयाँ नेतृत्व स्थापित गर्न इच्छुक देखिएको थापाले दाबी गर्नुभयो ।
